"Барса" хўжайинларининг "Манчестер Сити" юлдузи учун 80 миллион евролик таклифи иш бермади

Испаниянинг амалдаги чемпиони "Барселона" келаси мавсум олдидан таркибини кучайтириш мақсадида "Манчестер Сити"да тўп суришни давом этаётган ҳимоячи Йошко Гвардиолни ўз сафига қўшиб олиш устида иш олиб бормоқда.

Каталония клуби хорват футболчиси учун 80 миллион евро таклиф этгани айтилмоқда. Бироқ "Манчестер Сити" бу таклифни рад этган, дея хабар бермоқда журналист Доминик Шнайдер. Манбага кўра, инглиз клуби ўз режасини ўзгартирмоқчи эмас: Гвардиол камида 2027 йилгача жамоада қолиши керак, ҳатто агар у билан янги, узоқ муддатли шартнома имзолаш имкони бўлмаса ҳам. Ҳозирги шартнома 24 ёшли футболчи билан 2028 йилнинг ўрталаригача амал қилади.

Transfermarkt портали мутахассислари Йошко Гвардиолнинг бозор қийматини 70 миллион евро атрофида баҳоламоқда. Марказий ҳимоячи сифатида ўйнайдиган, шу билан бирга чап қанотда ҳам ҳаракат қила оладиган футболчига Ла Лиганинг яна бир гранди – "Реал" ҳам қизиқиш билдирмоқда.