“Барса”дан келган юлдуз ўрнини “Реал” тарбиялаган футболчи эгаллайди

“Интер Майами” Европа футболида порлаган футболчиларни ўз сафига қўшиб олиш сиёсатини давом эттирадиган бўлди. Маълумки, бу клубга Лионель Месси ўтганидан кейин аргентиналик юлдуз билан “Барселона”да бирга ўйнаган Серхио Бускетс, Жорди Альба, Луис Суарес сингари ўйинчилар ҳам Флоридага келганди.

Яқинда Жорди Альба МЛС чемпионати тугаганидан кейин бутсасини михга илишини эълон қилди. Шундан кейин “Интер Майами” машҳур ҳимоячининг ўрнини босадиган бошқа ўйинчи топиб қўйди. 

ESPN журналистларининг маълум қилишича, “Интер Майами” ҳимоя чизиғига Серхио Регилонни олиб келмоқчи.

28 ёшли испан футболчи ҳозирчаишсиз юрибди. “Тоттенхэм” ёзда шартномаси тугаган ўйинчи билан ҳамкорликни узайтирмади.

Регилон “Реал” тарбияланувчиси бўлса-да, Мадрид суперклубининг муҳим ўйинчисига айлана олмаган. Фаолияти давомида  Испаниянинг “Логроньес”, “”Севилья”, “Атлетико”, Англиянинг “Тоттенхэм”, “Манчестер Юнайтед” ва “Брентфорд” каби жамоаларида тўп тепган.