“Барселона” дарвозабон билан шартномани бекор қилмоқчи

"Барселона" ва дарвозабон Войсех Щченсни ўтган ёзда шартномани узайтиришда 35 ёшли посбонга 2 млн евро атрофида пул тўлаб, уни бекор қилиш мумкинлиги ҳақида келишиб олганди. Бу ҳақда Sport.es хабар бермоқда.

Манбага кўра, 2 млн евро - бу полшалик футболчи 2027 йилнинг ёзигача мўлжалланган меҳнат шартномаси бўйича маош сифатида олиши керак бўлган суммадан камроқ.

Каталония клуби дарвоза чизиғини янгилаш устида иш олиб бормоқда. Агар "кўк-анорранглилар" режаларини амалга оширишса, унда мавсум якунида Щченсни билан ҳамкорликни якунлашлари мумкин.

Полшалик футболчи "Барселона" сафида 2024 йилнинг октябрь ойидан буён тўп суриб келмоқда. Жорий мавсумда Щченсни барча мусобақаларда тўққизта ўйинда майдонга тушиб, 17 та гол ўтказиб юборди. Transfermarkt порталида келтирилган маълумотларга кўра, футболчининг бозор нархи 900 минг еврони ташкил этади.