«Барселона» Флорентино Пересни коррупцияда айблагани учун судга бериш билан қўрқитди

Каталониянинг машҳур клуби "Барселона" қаттиқ баёнот билан чиқди. Жамоа раҳбарияти Мадриднинг "Реал" клуби президенти Флорентино Пересни судга беришга тайёрланаётганини маълум қилди. Сабаб – Переснинг омма олдида айтган баҳсли ва кескин фикрлари.
 

Маълумки, май ойида "Реал" раҳбари махсус матбуот анжумани ўтказган эди. Унда у Испания ҳакамлар техник қўмитасининг собиқ вице-президенти Хосе Негрейрага оид жиноят иши ҳақида батафсил тўхталиб ўтган. Негрейра "Барселона"дан пул олгани, бу орқали коррупцияга қўл ургани айблови билан тергов қилинмоқда. Перес шу муносабат билан "Барселона"ни "йигирма йил давомида ҳакамларга пул тўлаб келган" деб очиқ айблаган, шунингдек, айнан шу ҳолат туфайли "Реал"дан ҳакамлар "етти чемпионлик унвонини ўғирлаган"ини таъкидлаган эди.
 

"Барселона" ўзининг расмий мурожаатида Пересни 12 май куни ўтказилган матбуот анжуманида ва ундан кейинги куни берган бир қатор интервьюларида туҳмат тарқатганликда айблади. Каталония клуби раҳбарияти "Реал" президенти ўз сўзларини омма олдида рад этиб, расман қайтариб олишини қатъий талаб қилмоқда. Клуб баёнотида таъкидланишича, Перес бу даъволарни "улар ёлғон эканини тўлиқ англаган ҳолда" айтган, унинг баёнотлари эса "клубнинг нуфузига путур етказадиган ва ишбилармонлик обрўсини камситадиган" хусусиятга эга.
 

"Барселона" тарқатган хабарда алоҳида қайд этилишича, агар Перес қўйилган талабларни бажармаса, клубнинг юридик хизмати дарҳол фуқаролик даъво аризасини судга тақдим этади.

Шу билан бирга, Ла Лигадаги икки катта рақиб ўртасидаги зиддият тобора кучайиб бораётгани ҳам қайд этилмоқда. Декабрь ойида нуфузли AS нашри ёзганидек, Мадриднинг "Реал" клуби ҳам Негрейра иши бўйича "Барселона"га қарши йирик суд даъвосини тайёрламоқда. Хабарларга кўра, "Реал" азалий рақибидан етказилган зарар учун кўп миллионлик товон ундиришни режалаштирмоқда.