«Барселона» футболчиси «Реал»га қарши ўйинни ўтказиб юбориши мумкин

«Барселона» ҳимоячиси Жюль Кунде жароҳатидан тикланишда давом этмоқда ва ҳозирча жамоа билан тўлиқ машғулотларга қайтмаган. Diario Sport нашрининг хабар беришича, «Реал»га қарши учрашувга 48 соат қолганида француз футболчиси индивидуал дастур асосида шуғулланган.

Кунде майдонга чиққан бўлса-да, жамоадошларидан алоҳида машқ қилган. У тўпиғи боғламлари чўзилиб кетгани сабабли тикланмоқда. Шу боис унинг бўлажак принципиал баҳсда иштирок этиши ҳозирча сўроқ остида қолмоқда.

«Барселона»да ҳимоячи ўйинга қадар керакли жисмоний ҳолатга келишига шубҳа билан қаралмоқда. Кунденинг учрашув учун қайдномага киритилиши ҳам ҳозирча аниқ эмас, унинг асосий таркибда майдонга тушиш эҳтимоли эса янада паст баҳоланмоқда.

Эслатиб ўтамиз, «Реал» — «Барселона» учрашуви 25 октябрь куни бўлиб ўтади.