"Барселона" ҳимоячиси Испания фуқаросига айланди

"Барселона"нинг уругвайлик ҳимоячиси Роналд Араухо Испания паспортини олди, деб хабар беради "Mundo Deportivo" нашри.

24 ёшли футболчи 2022 йил охирида фуқаролик олиш учун ариза топширган ва ўтган ҳафта у ҳужжатларни олиш учун судга келган.

Араухо 2018 йилнинг ёзида "Бостон Ривер" клубидан 4,7 миллион евро эвазига "Барселона"га ўтган эди. "Transfermarkt" портали  ҳимоячини 60 миллион еврога баҳоламоқда.

Роналд жорий мавсумда "кўк-анорранглилар" сафида 21 та ўйинда майдонга тушиб, битта гол ва битта голли узатмага муаллифлик қилган. Уругвай терма жамоаси таркибида ҳимоячи 12 та учрашув ўтказган.