"Барселона" ҳужумга жаҳон чемпионини олиб келмоқчи

"Барселона" раҳбарияти 36 ёшли Роберт Левандовскининг ўрнини босиш учун янги ҳужумчи харид қилиш имкониятини кўриб чиқмоқда. Бу ҳақда Испаниянинг "Marca" нашри хабар берди.

Хабарга кўра, асосий номзод –  "Атлетико Мадрид"да тўп сураётган 25 ёшли аргентиналик Хулиан Альварес. Бироқ футболчининг ўзи "Барселона"га ўтиш ниятида эмас. Альварес бир йил ичида Мадрид шаҳри ва жамоасига тўлиқ мослашиб улгурган ва у ердаги роли ортиб бормоқда.

Жорий мавсумда Альварес барча мусобақаларда 50 та ўйинда майдонга тушиб, 27 та гол урди ва 5 та голли узатма амалга оширди. Ҳозирда унинг жамоаси чемпионатда 66 очко билан учинчи ўринни эгаллаб турибди.