“Барселона” Жаҳон чемпионатидан кейин ҳужумчи сотиб олади

Мадриднинг "Атлетико" клуби ҳужумчиси Хулиан Альварес 2026 йилги Жаҳон чемпионатидан кейин "Барселона"га ўтади. Аргентиналик ҳужумчининг эҳтимолий трансфер суммаси 70 млн евро атрофида бўлиши мумкин. Бу ҳақда TyC Sports журналисти Хюго Балассоннинг X ижтимоий тармоғидаги саҳифасига таяниб хабар берди.

Манбага кўра, 26 ёшли футболчи совринлар ютиши мумкин бўлган жамоага ўтишни истамоқда.

Альварес 2024 йилнинг ёзидан бери "Атлетико"да ўйнамоқда. Жорий мавсумда аргентиналик футболчи барча мусобақаларда 35 та ўйинда майдонга тушиб, 13 та гол ва 6 та голли узатмага муаллифлик қилди. Футболчининг клуб билан амалдаги меҳнат шартномаси 2030 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 100 млн еврони ташкил этади.