"Барселона" Педри қанчага сафдан чиққанини маълум қилди

Испаниянинг "Барселона" клуби Х ижтимоий тармоғида ярим ҳимоячи Педрининг Чемпионлар лигаси умумий босқичидан ўрин олган Чехиянинг "Славия" жамоаси билан ўйинда (4:2) олган жароҳати ҳақида маълум қилди. Педри 61-дақиқада голли узатмани амалга оширди ва захирага олинди.

"Бугун эрталаб ўтказилган текширувлар асосий таркиб футболчиси Педрининг кеча Праганинг "Славия" клубига қарши ўйинда ўнг оёғининг тизза ости пайидан жароҳат олганини тасдиқлади. Тикланиш бир ой давом этиши кутилмоқда", - дейилади клуб хабарида.

Испания чемпионатининг жорий мавсумида 23 ёшли Педри 16 та ўйинда майдонга тушиб, 2 та гол урди ва 5 та голли узатмани амалга оширди. Шунингдек, унинг ҳисобида Чемпионлар лигасида бешта ўйин ва иккита голли узатма бор.