«Барселона» собиқ футболчисини ортга қайтармоқчи

«Мальорка» клуби фланг ҳужумчиси Хан Вирхили яна «Барселона» сафида пайдо бўлиши мумкин.

Mundo Deportivo нашри хабарига кўра, «Барселона» раҳбарияти яқинда ўзининг собиқ футболчиси ва унинг вакиллари билан учрашув ўтказган. 

Суҳбат давомида «Мальорка»нинг Ла Лигадан чиқиб кетганидан сўнг Вирхилининг келажаги муҳокама қилинган. Каталония клуби ҳали ҳам футболчи трансфери ҳуқуқларининг 40 фоизига эга ва қолган улушни 7,2 миллион евро эвазига сотиб олиш имкониятига эга. 19 ёшли вингернинг ўзи эса Испания чемпионатида қолишни истамоқда.

Ўтган мавсумда Вирхили барча мусобақалар доирасида 34 ўйинда майдонга тушиб, икки бор гол урди ва олти марта голли пас муаллифига айланди.

Transfermarkt портали маълумотларига кўра, ёш испаниялик футболчининг бозор қиймати 15 миллион еврони ташкил этади.