"Барселона" собиқ устози "Атлетико"ни бошқариши мумкин

"Атлетико" Чемпионлар лигасининг гуруҳ босқичида муваффақиятсизликка учради. Сешанба куни меҳмонда “Порту”дан мағлуб бўлган (1:2) “матрасчилар” квартетда сўнгги ўринни эгаллади ва ҳатто Европа Лигаси йўлланмасидан ҳам маҳрум бўлди.

ОАВда "Атлетико" раҳбарияти бош мураббий сифатида Диего Симеонени ишдан бўшатиши мумкинлиги ҳақида миш-мишлар тарқалмоқда. "El Chiringuito TV" хабарига кўра, "Барселона" собиқ устози Луис Энрике "матрасчилар" бош мураббийига айланиши мумкин. Манбага кўра, Мадрид клуби аллақачон Энрикега алоқадор бўлган шахслар билан боғланган.

Луис Энрике айни дамда Испания терма жамоаси бош мураббийи ҳисобланади. Унинг "қизил фурия" билан шартномаси шу йилнинг охирига қадар амал қилади.

Эслатиб ўтамиз, Диего Симеоне “Атлетико”ни салкам 11 йилдан бери бошқариб келади.