«Барселона» ва «Аякс» Кройф хотирасига хайрия учрашуви ўтказади

«Барселона» ва «Аякс» ҳар икки клубда ҳам тўп сурган Йохан Кройф хотирасига бағишланган хайрия учрашувини ташкил этади. Бу ҳақда Нидерландия клубининг расмий сайти хабар берди.

Учрашув 15 ноябрь куни Амстердамдаги «Йохан Кройф Арена» стадионида бўлиб ўтади. Ўйиндан тушган барча маблағ Кройф жамғармасига йўналтирилади.

Мазкур баҳсда ҳар икки клуб шарафини ҳимоя қилган Патрик Клюйверт, Франк ва Роналд де Бурлар, Яри Литманен ҳамда Рихард Витсге иштирок этишини тасдиқлаган. Шунингдек, Уэсли Снейдер, Эдвин ван дер Сар ва Ян Вертонген ҳам майдонга тушади.

Эслатиб ўтамиз, Йохан Кройф «Олтин тўп» совринини уч марта қўлга киритган. У «Аякс» сафида уч марта Европа чемпионлар кубоги, саккиз марта Нидерландия чемпионати ва беш марта мамлакат кубоги ғолиби бўлган. «Барселона» билан эса Испания чемпионлиги ва мамлакат кубогини қўлга киритган.

Собиқ футболчи 2016 йилда 68 ёшида вафот этган.