Ичкиликка муккасидан кетган Жек Грилиш бошқа футболчиларни ҳам йўлдан уряпти

«Эвертон» жамоасида Жек Грилишнинг вақтинча четлатилиши атрофида янги тафсилотлар пайдо бўлди.

Аввал хабар қилинганидек, «Манчестер Сити»га тегишли, аммо «Эвертон»да ижара асосида ўйнаётган яримҳимоячи жамоанинг якшанба куни бўлиб ўтган Англия Лига кубогидаги «Ньюкасл» (3:1)га қарши учрашуви рўйхатига киритилмаган эди. Расмий сабаб сифатида «клуб интизомини бузиш» кўрсатилган, Грилиш рухсатсиз машғулотни ўтказиб юборгани айтилган.

The Sun нашри ёзишича, ўтган душанба куни футболчи ЛондондагИ Grosvenor House меҳмонхонасида ўтган Pride of Britain Awards тақдирлаш маросимида иштирок этган. Кейинчалик у бир неча дўстлари билан караоке-клубга йўл олган ва у ерда тонгга қадар қолган.

Сешанба куни Грилиш Ливерпулдаги жамоа машғулотида қатнашган, аммо шу кун кечқурун уни ирланд паби Mucky Pupда яна дўстлари даврасида кўришган. У билан бирга «Эвертон» дарвозабони Жордан Пикфорд, яримҳимоячи Тайлер Диблинг ҳамда «Бёрнли» ҳимоячиси Кайл Уокер ҳам бўлгани қайд этилмоқда.

Гувоҳлардан бири қуйидагиларни айтган: «Улар пабнинг орқа томонидаги хусусий хоналардан бирида «ПСЖ» – «Барселона» ўйинини томоша қилишарди. Ҳамманинг кайфияти кўтаринки эди, жуда кўп ичимлик истеъмол қилишди, Жек ҳам шулар қаторида эди».

Манбаларга кўра, чап қанот яримҳимоячиси ва унинг «Эвертон»даги жамоадошларига чоршанба куни дам олиш куни сифатида берилган.