"Барселона" Хулиан Альварес трансфери учун лимитини белгилади

"Атлетико" ҳужумчиси Хулиан Альвареснинг "Барселона"га ўтиши масаласи ҳали ҳам долзарб. Каталония клуби раҳбарияти аргентиналик футболчини сотиб олиш учун аниқ молиявий чегара белгилаган: "Барселона" трансфер учун 120 миллион евронадан ортиқ тўлашга тайёр эмас. Бу ҳақда журналист Луис Рохо ўз ижтимоий тармоқларида хабар берди.

Шунингдек, кеча Мадриднинг "Реал" клуби Альварес учун 150 миллион евро таклиф этгани маълум бўлди. Шунга қарамасдан, "Барселона" бу хабарга хотиржам муносабатда бўлмоқда. Каталон клубида ўз молиявий имкониятларини яхши англаб, "Реал" билан пул бўйича баҳсга киришмасликка қарор қилинган.

Маълумотларга кўра, "Барселона" Альварес учун ўзининг энг юқори таклифини – 120 миллион евролик пакетни тақдим этган. Энди сўз "Атлетико" раҳбариятида. Хулианнинг ўзи эса "матрасчилар"дан уни айнан "Барса"га қўйиб юборишларини сўраётгани айтилмоқда.