“Барселона” янги келган барча футболчини рўйхатдан ўтказиш йўлини топди

"Барселона" ҳимоячиси Жерар Пике клубга ёрдам бериш учун маошини камайтиришга рози бўлди, деб хабар беради “Sport.es”.

35 ёшли испаниялик 2020 йилнинг октябрида клубнинг олдинги президенти Хосеп Бартомеу даврида имзоланган шартномасини бекор қилишга тайёр. 2024 йилнинг июнь ойи охиригача амал қиладиган келишувга кўра, футболчи 28 миллион евро маош ва яна 12 миллион евро бонус олади.

"Барселона" раҳбарияти нафақат Пике, балки, Марк-Андре тер Штеген, Френки де Йонг ва Клеман Лангле билан тузилган шартномалар қонунга зид равишда имзоланган деб ҳисобламоқда. Шу боис, Пике шартномани бекор қилишга ва маоши камайтирилган янги шартнома имзолашга рози бўлди. Бунинг эвазига "Барселона" ёзда жамоага янги келган барча футболчиларни рўйхатдан ўтказиши мумкин бўлади. Бунгача клуб маош борасидаги муаммолар туфайли буни уддалай олмаётган эди.

"Барселона" ёзда ҳимоячилар Андреас Кристенсен ва Жюль Кунде, ярим ҳимоячилар Франк Кесси ва Рафинья, шунингдек, ҳужумчи Роберт Левандовскини ўз сафига қўшиб олди. Бундан ташқари, клуб ярим ҳимоячи Серж Роберто ва ҳужумчи Усмон Дембеле билан янги шартнома имзолади.