"Барселона" — "Атлетико" учрашувини бошқарган ҳакам четлаштирилиши мумкин

"Барселона" ЕЧЛ 1/4 финали доирасида "Атлетико"га қарши ўйиндаги ҳакамликдан норози бўлиб, УЕФАга расмий шикоят қилишни кўриб чиқмоқда.

Каталонияликлар 0:2 ҳисобида мағлуб бўлган ушбу баҳсда бир қатор баҳсли қарорлардан норози бўлган. Жумладан, учрашувнинг 54-дақиқасида "Атлетико" ҳимоячиси Марк Пубиль жарима майдонида тўпни қўли билан тўхтатганига қарамай, бош ҳакам Иштван Ковач пенальти белгиламади. ВАР тизимига масъул бўлган Кристиан Дингерт ҳам ушбу вазиятга аралашмади.

Шунингдек, "Барселона" Пау Кубарсининг четлатилишига ҳам эътироз билдирмоқда. Футболчи дастлаб сариқ карточка олган бўлса, ВАР аралашувидан сўнг қизил карточка билан майдондан четлатилган. Клуб раҳбарияти ВАР қайси ҳолатларда аралашиши ёки аралашмаслигини тушунмаётганини таъкидламоқда.

Бундан ташқари, каталонияликлар фикрича, "Атлетико" ярим ҳимоячиси Коке биринчи бўлимдаёқ майдондан четлатилиши керак эди.

Манбага кўра, айнан шу ҳолатлар сабаб "Барселона" раҳбарияти ҳакамлик бўйича УЕФАга расмий шикоят йўллаш имкониятини кўриб чиқмоқда.

Шунингдек, Diaro Sport нашрининг ёзишича, бош ҳакам Иштван Ковач  ЕЧЛнинг қолган ўйинларига тайинланмаслиги кутилмоқда. 

Маълумот учун, жавоб учрашуви 14 апрел куни Мадридда бўлиб ўтади.