Бартомеу Неймарнинг трансферидан келадиган пулга "Барселона"ни кучайтирмоқчи

Каталониянинг “Барселона” клуби президенти Хосеп Мария Бартомеу жамоанинг бразилиялик ҳужумчиси Неймарнинг ПСЖга ўтиши борасидаги вазият ҳақида гапириб ўтди.

“Биз ҳар йили кўп ютуқларга эриша оладиган рақобатдош жамоа шакллантиришга ҳаракат қиламиз. Баъзи мавсумларда буни уддалай олганмиз, баъзиларида эса йўқ. Аммо барибир энг кучлиси бўлишга ҳаракат қиламиз. Биз Неймар жамоамизда қолишини истаймиз, бироқ ўртада товон пули бор. Агар у кетишни истаса, унинг учун белгиланган пулни тўлашади ва у кетади. Неймар билан бу ҳақда гаплашдикми? Йўқ, биз гаплашмадик. Испанияга қайтган пайтимиз у билан ўтириб, барчасини келишиб оламиз. Айтишим мумкинки, унинг трансферидан тушадиган ҳар қандай маблағлар фақат жамоани кучайтириш учун сарфланади.

Неймарни сотиб оладиган жамоа унинг шартномасида белгилаб қўйилган компенсация суммасини тийинигача тўлашга мажбур. УЕФАда молиявий фэйр-плей деган нарса бор. Агар қайсидир жамоа бунга амал қилмайдиган бўлса, санкциялар қўлланилиши мумкин. “Барселона” йилига 800 млн евро даромад кўрадиган дунёдаги икки клубнинг бири ҳисобланади. Ушбу маблағлар эса жамоа ривожи учун сарф этилади”, - дейди Бартомеу AS нашрига берган интервьюсида.

Эслатиб ўтамиз, Неймарнинг товон пули 222 млн еврони ташкил этади.