“Бавария” бир ўйинчи учун тўртта юлдузидан воз кечади

Бундеслигада яна пешқадамлик ўз қўлига олган “Бавария” анчадан бери “Челси” ҳужумчиси Кристофер Нкункуни ўз таркибига қўшиб олишни орзу қилмоқда.

Мюнхенликлар  январь ойида франциялик футболчини трансфер қилиш масаласида “Челси”га мурожаат қилган эди. Бироқ томонлар молиявий масалада бир тўхтамга кела олмади.

Нкунку қимматбаҳо ҳужумчилар тоифасига киради. “Аристократлар” бу ўйинчи учун 2023 йилнинг ёзида 60 миллион евро сарфлаган ва энди бу суммадан камига уни қўйиб юбормайди.

“Бавария” бош мураббий Венсан Компани Англия Премьер-лигасига кетишидан аввал “Лейпциг” сафида Бундеслигани ёндирган ҳужумчини ўз жамоасида кўрмоқчи.

Энди Мюнхен суперклуби раҳбарияти бу трансферни амалга ошириш учун тўрт нафар юлдузи билан хайрлашишни маъқул топди. Кетадиганлар рўйхатига Леон Горецка (трансфер бозоридаги нархи 22 миллион евро), Серж Гнабри (35 миллион евро), Кингсли Кома (35 миллион евро), Брайан Сарагоса (12 миллион евро) каби футболчиларни киритди.

Шунингдек, харидор чиқса, Жоау Палинья, Рафаэль Геррейро ва Саша Боэ ҳам сотиб юборилади.

Бу трансферлардан келадиган маблағ Кристофер Нкункуни олишга йўналтирилади. 27 ёшли ҳужумчининг ўзи “Челси”да унга етарли даражада ўйин амалиёти берилмаётганидан норози ва имкон қадар тезроқ “Бавария”га кўчиб ўтишга ошиқмоқда.