Belarusda bombardirlar bahsi. Yaxshiboev bugun gol urishi shart!
Belarus chempionatida 12-tur o‘yinlari davom ettiriladi. Bugungi uchrashuvlarning ahamiyatli tomoni shundaki, musobaqa to‘purarlari bahsida etakchilik qilayotgan futbolchilar maydonga tushadi.
Hamyurtlarimiz Jasur Yaxshiboev hamda Shahboz Umarov faoliyat olib boradigan "Energetik-BGU"ning safarda "Shaxtyor" Soligorsk jamoasiga qarshi o‘tkazadigan uchrashuvi turning markaziy o‘yini bo‘ladi. Bu uchrashuvda Jasur gollari sonini oshirishi kutilmoqda. O‘zbek legioneri hisobida hozircha 7 ta gol bor va u Gegam Kadimyan bilan birga bombardirlar bahsini boshqarmoqda.
O‘z navbatida, mezbonlar safidagi to‘purar Vitaliy Lisakovich ham Yaxshiboevga etib olishga harakat qiladi. 11 ta o‘yinda maydonga tushgan futbolchi beshta golga mualliflik qilgan.
Jasur Yaxshiboevning asosiy raqobatchisi Gegam Kadimyanning jamoasi “Neman” bu turda safar uchrashuvida “Slaviya” ustidan 3:1 hisobida zafar quchdi. To‘liq o‘ynagan Gegam maydonni golsiz tark etdi. Bugun Jasurda Kadimyandan o‘zib ketish imkoniyati bor.
Shuningdek, 12-turda o‘zaro kuch sinashadigan “Vitebsk” va “BATE” o‘rtasidagi bahs ham o‘zbekistonlik futbol muxlislarini befarq qoldirmaydi. Chunki mezbonlar mazkur uchrashuvda birinchi o‘rinda borayotgan “BATE”ni mag‘lub etadigan bo‘lsa, “Energetik-BGU”da peshqadamga tenglashib olish uchun qulay vaziyat yuzaga keladi. Buning uchun “talabalar” safar uchrashuvida uchinchi o‘rinni egallab turgan “Shaxtyor”ni mag‘lubiyatga uchratishi kerak.
Qolaversa, “Vitebsk” – “BATE” o‘yini Jasur Yaxshiboev uchun ham ahamiyatli. Chunki mezbonlarning moldovalik legioneri Ion Nikolaesku 8 ta o‘yinda beshta gol urgan va to‘purarlar bahsida o‘zbekistonlik hujumchini ta’qib qilmoqda.
“BATE”ning serbiyalik hujumchisi Nemanya Milich to‘qqizta o‘yinda raqiblar darvozasini besh marotaba ishg‘ol qilgan holda to‘purarlik unvoni uchun kurashga qo‘shildi.
“Shaxter” – “Energetik-BGU” uchrashuvi Toshkent vaqti bilan soat 22:00 da start oladi.
Fikrlar