"Bellator 244" турнирининг прелим кардидаги жанглар ўз якунига етди

Айни дақиқаларда АҚШнинг Коннектикут штати Анкасвилл шаҳрида "Bellator 244" турнири давом этмоқда. Ҳозиргина ушбу турнирнинг прелим кардидаги жанглар якунланди. Унда бир қатор кутилган ва кутилмаган натижалар қайд этилди. Жумладан, россиялик енгил вазн (70.3 кг) тоифасида ўз жангларини ўтказадиган Владимир Токов америкалик Крис Гонсалесга имкониятни бой бериб қўйди.

Шунингдек, тожикистонлик ярим енгил вазн тоифасида (65.77 кг) ҳаракат қиладиган Салим Муҳиддинов бразилиялик Уэбер Алмейдага биринчи раунднинг ўзидаёқ техник нокаут эвазига мағлуб бўлди. Мағлубиятсиз одимлаётган украиналик Ярослав Амосов эса, америкалик Марк Лемминжер билан жанг олиб борди. Биринчи раундда америкалик жангчи жиддий жароҳат олди ва унинг иккинчи раундга чиқишига рухсат берилмади. Натижада, дастлабки раунддаги фаол ҳаракати ва катта устунлиги эвазига, қолаверса, якуний хулосадан кейин Амосов ҳаққоний тарзда ғалаба қозонди.

Қуйида прелим карддан ўрин олган бошқа жангларнинг натижалари билан танишинг:

Владислав Порубченко (Украина) - Жон Де Жезус (АҚШ) - очколар ҳисобига Жезус ғалаба қозонди. 

Лукас Бреннан ( АҚШ)- Уилл Смит (АҚШ) - иккинчи раундда техник нокаут эвазига Бреннан ғалаба қозонди. 

Эрик Перес (Мексика)- Жош Хилл (Канада) - очколар ҳисобига Хилл ғолиб чиқди.

Адам Пиколлоти (АҚШ) - Сидней Аутлоу (АҚШ) - очколар ҳисобига Сидней зафар қучди.