Бензема Мессининг ортидан кетмоқда!

“Реал”нинг асосий тўпурари Карим Бензема Ла Лиганинг учинчи турида “Эспаньол” дарвозасини икки бор ишқол қилиб, жамоасининг 3:1 ҳисобидаги ғалабасини таъминлади.

Дублга эришган 34 ёшли форвард Испания чемпионати тўпурарлари орасида бир поғона юқорилаб, еттинчи ўринга кўтарилиб олди.

Франциялик футболчи Ла Лигада 417 та учрашувдаги голлари сонини 222 та етказди ва 353 та ўйинда 221 та тўп киритган Сесар Родригесдан ўзиб кетди.

Карим Бенземага олтинчи ўринда турган Альфредо Ди Стефанони ортда қолдириш учун яна олтита гол керак. Альфредо Испания чемпионатида 329 та ўйинда рақиблар дарвозасини 227 бора ишғол қилган.

Испания чемпионатлари тарихида энг кўп гол урган футболчи Лионель Месси ҳисобланади. “Барселона” шарафини муносиб ҳимоя қилган аргентиналик юлдуз миллий чемпионатда 520 та беллашувда қатнашиб, 474 та тўп киритган.