Бензема "Реал"ни тарк этиши мумкин. Унга Саудиядан супер таклиф бор

Мадриднинг "Реал" клуби раҳбарияти Карим Бензема жамоани тарк этиш ҳақида ўйламоқда деб гумон қилмоқда.

"Relevo" нашри хабарига кўра, Бензема Саудия Арабистонидан 2 мавсумда 200 миллион евро ишлаб олиши мумкин бўлган таклиф олган. Таклиф рекламадан қўшимча даромад олиш, болалар учун мактаблар яратиш, шунингдек, Саудия Арабистони, Греция ва Мисрнинг 2030 йилда жаҳон чемпионатини ўтказиш учун қўшма аризасини тақдим этиш имкониятини ўз ичига олади. Бундан ташқари, Бензема солиқ тўлашдан озод қилиниши мумкинлиги хабар қилинган.

Маълум қилинишича, мураббийлар штаби ва "қироллик клуби" раҳбариятининг айрим аъзолари Бензема таклифни қабул қилиб, шу ёздаёқ "Реал"ни тарк этиш ҳақида ўйламоқда, деб гумон қилмоқда. Клубни, шунингдек, мадридликлар сардорининг мавсумнинг сўнгги қисмида ўзини тутиши - хусусан, унинг "Хетафе" билан ўйин олдидан Испания кубоги тақдимотида қатнашмагани ва "Манчестер Сити"га мағлуб бўлганидан кейин матбуотга гапиришдан бош тортгани ҳам ҳайратда.