Бердиев билан нега жанжаллашгани, Эргашевга мурожаат ва "Насаф"нинг қайтаётгани ҳақида Шерзод Насруллаев билан интервью

Бугун 6 турни якунлаб берган "Бунёдкор" - "Насаф" ўйини кўплаб воқеаларга бой ўтди. Шу боис, "Насаф" қанот ҳимоячиси - Шерзод Насруллаев билан баҳсдаги айрим эпизодлар масаласида суҳбатлашдик.

Рўзиқул Бердиев билан 55 дақиқада нима сабабли майдонда жанжаллашиб кетингизлар?

- Тўғриси, ҳеч қандай жанжал бўлгани йўқ. "Рўзи ака" мени ўзимни босиб олишим кераклигини, ўйинни ғалаба билан тугатиш учун бу муҳимлигини такрорлади. Бундан аввалроқ, сариқ карточка олганим боис, бироз қизишиб турган эдим. Боз устига, Даврон Эргашев менга нисбатан жуда қўпол чиқиб келди. Ҳакам индагани йўқ. Шу пайтда, қизишаётганими кўргач, Бердиев олдимга келиб, "ўзингни қўлга ол, қизишма деб",- деб уришиб берди. Биз мураббийимиз билан бундай ҳолатларга тез-тез тушиб турамиз. Бу футбол. Машғулотларда ҳам, мана шундай кескинлик юзага келиб туради. Биз учун бу нормал ҳолат. Мен уларни тушунаман. Натижа бугун бизга жуда керак эди. Афсус, якунда гол ўтказиб юбордик. Мухлисларни хурсанд қилмоқчи эдик.

Ўйиндан сўнг, бўлган воқеага нима сабаб бўлди деб ўйлайсиз?

- Ҳакам финал ҳуштагини чалиши билан, биз ундан соатини кўрсатишини сўрадик. Менимча, рақиб қўшиб берилган дақиқа тугаганидан сўнг, гол ургандек туюлди. Рефери билан гаплашиб бўлгач, кийиниш хонаси томон юрдик. Шу пайт, "Бунёдкор" сардори бизни мухлислар томонга қарата хунук қилиқларни қилишни бошлади. Уни тўхтатмоқчи эдик, биз томонга интилди. Кейин, ҳаммаси бошланиб кетди. Билмадим-ку, лекин бир киши кам ўйнаган жамоа билан баҳсда дурангга бу қадар хурсанд бўлган бўлса, агар ғалаба қозонганда нима қилган бўлар эди? Тўғриси, Даврон Эргашевнинг бу ҳаракати якунда катта жанжалга сабаб бўлди.

Бугун "Насаф" яхши ўйин ўтказди. Мавсум бошидан бери бу жамоанинг илк ёрқин ўйинларидан бири...

- Фикрингизга қўшиламан. Биласизми, футбол ишқибозлари баъзан кўп нарсани тушунмай кескин танқид қилади. Ҳозир, жамоамизда таркиб билан муаммолар эндигина бартараф этилмоқда. Шунда ҳам, кадрлар етишмаётгани рост. Спорт формамизни ҳам тиклаб боряпмиз. Жароҳат олганлар қайтмоқда. Менимча, секин-аста яна аввалги топ даражамизга чиқиб оламиз. Бизга, бироз вақт керак. Чемпионатда ҳам жуда кўп очко йўқотдик деб ўйламайман. Кураш энди бошланди. Бизда, вазиятни ўнглаш учун имконият ҳали етарлича бор.

Урилмаган пеналти борасида фикрингиз қандай?

- Тўғриси, машғулотлар чоғида бу борада иш олиб бордик. Ҳаммаси аъло даражада чиққан эди. Реализацияга келганида, бироз омад мендан юз ўгирди. Шунга қарамай, тушкунликка тушганим йўқ. Бу футбол. Унда ҳамма нарса бўлади. Ўйлашимча, ёмон ўйин ўтказганимиз йўқ. Кейинги турларда керакли натижаларни қўлга киритиб, мухлисларимизни хурсанд қиламиз.