Биласизми, "Андижон" футболчисига Суперлиганинг 8 та, Европанинг эса 3 та клуби қизиқиб қолди

Сарлавҳани ўқиган ўқувчи дарҳол йўғе, дейиши мумкин. Бу табиий. Лекин кузатиб бораётган бўлсангиз, “Андижон” футболчиларига талаб кучли. Ҳозиргача Фарҳод Бекмуродов, Фарҳод Мираҳматов ва Хушнуд Авилов сингари етакчи ўйинчилар бошқа клублар билан келишувларга эришишди. Булардан ташқари, “Андижон”нинг яна бир талай ўйинчиларига яхши таклифлар бўляпти. 

Айниқса, 2000 йилда туғилган иқтидорли қанот ярим ҳимоячиси Дониёр Абдуманноповнинг бозори чаққон дейишимиз мумкин. Чунки энг кўп талаб ҳозирда ушбу ўйинчига бўляпти. У қанот ярим ҳимоясида ҳам, ҳужумчи ортида ҳам бемалол ўйнай олади. Асосийси, унда иқтидор бор. Шунинг учун бўлса керак, Абдуманноповга Суперлиганинг нақд 8 та клуби жиддий қизиқиш билдиряпти. Бу бор гап. Мавсум охирларида ҳам, яқинда ҳам айрим мураббийлар ҳаттоки ўзимга ҳам ушбу ўйинчига қизиқаётганликларини яширишмаганди. Қизиғи, бу ҳали ҳаммаси эмас. Дониёр керак бўлса янги мавсумни легионер сифатида ўтказиши ҳам мумкин. Бу борада унда вариантлар бор. Россия, Беларусь ва Польша жамоалари ҳам уни диққат билан кузатиб боришяпти ва қизиқиш борлигини билдиришоқда. Мисол учун Россия биринчи дивизиони етакчиларидан бири, премьер-лига йўлланмаси учун курашаётган клуб ҳам “Андижон” футболчисига бефарқ эмас. Якунига етган мавсумда у “Андижон” сафида 16 та учрашувда майдонга тушиб 2 та гол урди ва 3 та голли узатмани амалга оширди. Албатта, мавсум давомида уни жароҳатлар ҳам безовта қилиб турди. 

20 ёшли ўйинчининг келажаги порлоқ. Шу боис ҳам уни Суперлигамизда кўзга кўринган мураббийлар ўз жамоасида кўришни хоҳлашяпти. Кўпчилик эса “Андижон”ни қатор етакчилар тарк этаётгани фонида Абдуманноповни ҳам бошқа клубга кетди деб ўйлашмоқда. Тўғри, Дониёрга таклифлар бисёр бўлса-да, аммо ҳали андижонликлар сафини расман тарк этгани йўқ. Шартномаси тугаб бораётган футболчини аввало “Андижон” раҳбарлари ва мураббийлари қандай бўлмасин жамоада сақлаб қолиш ҳаракатида юрибдилар. Бунинг устига бош мураббий Отабек Ғуломхўжаев учун ҳам Абдуманнопов муҳим ўйинчи ва янги мавсумда ўз режаларига киритган. Шу сабабли мураббий ҳам уни сақлаб қолишга ҳаракат қилмоқда. Ғуломхўжаев илгари турли ёшдаги терма жамоаларда ишлаганида Дониёрни таркибга жалб қиларди ва унинг имкониятларини жуда яхши билади. Ҳозир ҳам у терма жамоага номзод ўйинчи. Айни пайтда бу футболчи билан қизғин музокаралар олиб бориляпти. “Андижон” бош мураббийи эса Абдуманноповга чиндан ҳам Суперлиганинг 8 та ва Европанинг 3 та клубидан таклиф борлигини sports.uz сайтига берган интервьюсида тасдиқлади. Тез орада Ғуломхўжаев билан уюштирилган қизиқарли суҳбатни ҳам сайтимизда ўқишингиз мумкин. Айтмоқчимизки, мураббийнинг ўша гапи футболчига бўлган эътибор ҳақиқатан юқори эканлигини билдиради. Тўғри, ҳали унда тажриба шаклланмаган. Бироқ юқорида айтганимиздек, катта иқтидор бор. Келажакда эса ўзбек футболининг муҳим ўйинчиларидан бири бўлиб етишиши эҳтимоли юқори. Шу сабабли ҳам мураббийлар унга бефарқ эмаслар. 

Куни кеча “Қўқон-1912” бош мураббийи Бахтиёр Ашурматов sports.uz сайти меҳмони бўлди. “Футболдан гаплашамиз” лойиҳаси доирасида қизиқарли мавзуларда суҳбат уюштирдик. Ўша мулоқот жараёнида ҳам Ашурматов бевосита “Андижон”га тўхталиб, клуб бу мавсумда Суперлигада плей-офф орқалигина элитада аранг жон сақлаб қолганига қарамай, жамоанинг ўйинчиларига талаб ва эътибор юқори бўлаётганини алоҳида таъкидлаб ўтди. Бу бежиз эмас. Ашурматовнинг ушбу гапи ҳам юқоридаги фикрларимизни тасдиқлаб турибди.

Кўриниб турибдики, Суперлига клубларида Дониёр Абдуманнопов учун кураш қизғин тус олган. Албатта, кейинчалик бу ўйинчининг қай даражада шаклланиши ва тажриба орттиришини вақт кўрсатади. Бироқ мураббийлар унда ниманидир кўра олишгани учун ҳам таклиф билан чиқишяпти. Биз эса у билан боғлиқ воқеалар ривожини кузатишда давом этамиз.