Биз “Барселона”га ишонмаймиз!

“Бавария” раҳбарияти Роберт Левандовскини трансфер қилишга уринаётган  “Барселона”га ўз шартларини қўйди.

Каталонияликлар польшалик форвардни олиб келиш учун мюнхенликларга 32 миллион евро таклиф қилмоқда. Бироқ, “Бавария” ҳужумчининг бир йиллик шартномаси қолганига қарамай, уни 50 миллион еврога баҳолаяпти.

Бундан ташқари, Бундеслига чемпиони каталонияликларнинг трансфер суммасини бўлиб тўлаш таклифини ҳам қабул қилмади. Маълумотларга қараганда, “Бавария” мутасаддилари Каталония клубининг молиявий инқирозда эканини инобатга олиб, трансфер учун тўловларни белгиланган муддатда амалга оширишига ишонмаяпти.

Левандовски “Бавария”да 2014 йилдан бери ўйнаяпти. Польшалик тўпурарнинг клуб раҳбарияти билан муносабати бузилган. Шу боис у ўзига тезроқ янги жамоа топмоқчи.