Бизга Муҳаммад Салоҳ маъқул, Левандовски эмас!

“Барселона” бош мураббийи Хави ўз жамоаси ҳужум чизиғини “Бавария” тўпурари Роберт Левандовски билан эмас, “Ливерпуль” форварди Муҳаммад Салоҳ билан кучайтирмоқчи.

Аввалроқ, Бундеслига тўпурари Каталонияга келиши мумкинлиги ҳақида хабарлар тарқатилганди. Бироқ, Хави клуб мутасаддилари ёзда Эрлинг Холанд трансферини амалга ошира олмаса, Муҳаммад Салоҳни олиб келиш кераклигини уқтирмоқда.

Испаниялик мутахассис у қўллаётган тактик схемаларга меҳнатдан қочмайдиган Муҳаммад Салоҳ мос келишини таъкидлаяпти. Бундан ташқари, мисрлик тўпурарнинг “Ливерпуль” билан шартномаси якунланиши бир йил қолди. Агар томонлар тез орада келиша олмаса, тажрибали ўйинчини нисбатан арзонроқ нархга трансфер қилиш имкони пайдо бўлади.

Муҳаммад Салоҳ барча турнирлар доирасида ливерпулликлар учун 36 та учрашув ўтказиб, 28 та тўп киритди ва 10 та голли пас оширди.