Бошланди! Саудлар PFL промоушени акцияларини сотиб олишди

Бошланди! Саудлар PFL промоушени акцияларини сотиб олишди.
Жаҳоннинг етакчи ММА промоушенларидан бири PFL ўзининг $100 млн. га тенг акцияларини Саудия Арабистонининг SRJ Sports Investment фондига сотди. Бу акциялар миқдори саудияликларга PFL бошқарувида тўғридан-тўғри иштирок этиш ҳуқуқини бермасада, улар ушбу промоушен бошчилигида ўзларининг йўналишларига асос солишлари аниқ бўлиб улгурди.

PFL Mena (Middle East and North Africa) - эндиликда PFL томонидан Саудия Арабистони, БАА, Қатар, Баҳрайн каби Яқин Шарқ ва Миср, Жазоир, Тунис, Марокаш каби Шимолий Африка давлатлари таркибидан қатнашаётган жангчилар иштирокида худди шу ҳудудларда ташкил этиладиган турнирларни кўришимиз мумкин. Бу тажриба PFL учун бегона эмас. Улар бу йилдан бошлаб Европа давлатида шу каби лигани йўлга қўйиб олишганди. PFL Europe турнирлари ҳозирча Англиянинг Ньюкасл ва Германиянинг Берлин шаҳрида бўлиб ўтди ва унда европалик жангчилар ўзаро баҳс олиб боришди. Йил сўнггигача Париж ва Дублин шаҳарларида ҳам шу каби турнирлар бўлиб ўтиши кўзда тутилган.
PFL Mena турнирлари 2024-йилнинг 2-чорагидан старт олиши кўзда тутилган. Financial Times нашрининг маълум қилишича, ушбу бўлимнинг очилишида камерунлик собиқ UFC чемпиони ва ҳозирда PFL промоушени таркибига қўшилган Френсис Нганну (17-3) етакчи аҳамият касб этган. Шунингдек, SRJ Sports Investment Тайсон Фьюри ва Френсис Нганну ўртасидаги бокс оқшоми ташкилотчиси ҳам саналади.