Бразилиядан SPORTS.UZ мухбирига кутилмаган қўнғироқ!

Sports.uz сайти ўқувчилари учун эксклюзив мақола ва суҳбатларни тайёрлашда давом этади. Сайтимизни мунтазам равишда кузатиб келаётганлар яхши биладиларки, тез-тез хорижлик футбол инсонлари билан ўзига хос суҳбатларни ҳукмингизга ҳавола этиб келмоқда. Уларнинг орасида албатта кўзга кўринган, таниқли мутахассислари ҳам бор. Бу сафар ҳам Sports.uz мухбири биров кутмаган навбатдаги эксклюзив интервьюни уюштирди.

Одатда, хорижликлар билан, айниқса, таниқли шахслар билан сайтимиз учун суҳбатлар уюштириш ўз-ўзидан содир бўлиб қолмайди. Бунинг замирида катта машаққат ётади. Яъни, ўзингиз истаган суҳбатдошни қидириб топиш, уни кўндириш каби ўзига яраша осон бўлмаган томонлари ҳам бор.

Демак, Sports.uzнинг навбатдаги “нишони” билан танишинг: узоқ йиллар Россия футболида ном қозонган бразилиялик футболчи – Ари! Ҳа, бу ўша сиз билган ва таниган, “Спартак”, “Краснодар”, “Локомотив” ҳамда Россия терма жамоасида тўп сурган ҳужумчи.  Ҳайрон бўлманг, ўз вақтида Россия терма жамоаси ушбу футболчини маҳаллийлаштирган ҳолда тажрибасидан фойдаланишни лозим топган.

Уни Европа футболида ҳам ўз номи бор. Топ-ўйинчи, айниқса, Россия чемпионатидаги фаолиятидан кейин бразилиялик футболчи жуда тез танила бошлади. Ари “Краснодар”да тўп суриб юрган кезларида ҳамюртимиз Одил Аҳмедов билан ҳам бирга ўйнаган.

Ари билан сайтимиз учун суҳбатлашиш истаги пайдо бўлгач, уни қидиришга тушдик ва ҳаракатларимиз бесамар кетмади. Лекин у билан алоқа ўрнатиш осон кечмаганини тан оламиз. Аслида бразилиялик футболчи билан ўтган йили гаплашмоқчи эдик. Лекин аввалига унга ёзган хабарларимиз жавобсиз қолаверди. Албатта, ўзимизни таништириш ва қаерданлигимиз бўйича ҳам Арига хабар йўллагандик. Аҳён-аҳёнда ундан қисқа сатрларда “салом”, “яхши, раҳмат”, деган жавобларни олардик, холос.

Хуллас, орадан анча вақт ўтди ҳамки, ундан дарак бўлмади. Шунда бундай катта даражадаги футболчиларни “қармоқ”қа солиш осон эмас-да, дея ўзимизни-ўзимиз овунтириб юрдик. Лекин интилганга толе ёр дейишганидек, куни кеча Бразилиядан кутилмаган қўнғироқ бўлди. Ҳа, бу ўша ёзганларимизни деярли жавобсиз қолдирган Ари эди.

Рости, унинг биз билан алоқага чиқиши кутилмаган ҳол бўлди. Тахмин қилганимиздек, футболчининг вақти тиғиз эди. Шунга қарамай, ҳозирда Бразилия чемпионатида тўп сураётганини, натижалари ҳақида бироз гапирди ва у Sports.uz сайти учун суҳбатлашишга рози бўлди. Табиийки, футболимизга тааллуқли фикрларини ҳам билдирди. Тез орада сайтимиз орқали бразилиялик тажрибали ўйинчи билан суҳбат сиз ўқувчиларга тақдим этилади. Бизни кузатишда давом этинг!