Бразилиялик футболчилар энди Англияга киролмайди

Буюк Британия ҳукумати Жанубий Америка ва Португалиядан келганларни мамлакат ҳудудига киришини тақиқлади.

Бунга Бразилияда коноравируснинг янги штамми аниқлангани сабаб қилиб кўрсатилмоқда. Португалиянинг бу рўйхатга киритилиши бу давлатнинг Бразилия билан кучли туристик алоқаларга эга экани билан изоҳланмоқда.

Ҳукуматнинг бу қарори футболдаги трансферларга ҳам таъсир қилади. Чунки Буюк Британия Европа Иттифоқидан чиққанидан кейин ишлашга рухсат бериш талаблари соддалаштирилган ва бунинг самарасида Англия клублари Бразилия футболчиларини жалб қилиш имкониятидан кенг фойдаланаётган эди. Бундан ташқари, Португалия ҳам инглиз жамоаларини иқтидорли ўйинчилар билан таъминлайдиган ўзига хос фабрика ҳисобланади.

Мазкур тақиқ қачонгача давом этиши кўрсатилмагани боис, Британия клублари қишки трансферлар мавсумида жанубий америкалик ва португалиялик футболчиларни ўз сафига қўшолмаслигининг эҳтимоли катта.

Матнда хатолик топсангиз, ўша хатони белгилаб, бизга жўнатинг (Ctrl + Enter)