"Бу ердаги маошимни ўзимизда қилиб беришса қайтишга рози бўламан". Ўз клубининг сардорига айланган легионеримиз ҳақида

Ўзбекистонлик футболчилар орасида турли мамлакатларда тўп сураётган легионерларимиз бор. Уларни ёритиш орқали мухлислар янада тўлиқроқ маълумотларга эга бўлиб борадилар.

Бир неча йилдан бери Индонезия чемпионатида фаолият кўрсатаётган Жавлон Гусейновни унутмадингизми? У шу кунгача фақат бир клубда – “Борнео”да тўп суриб келмоқда. Ўзидан яхши таассурот қолдираётгани сабабли жамоа сардорига айланган.

Хўш, анча тажриба тўплаган ҳимоячи чемпионатимизга қайтадими ёки яна қолмоқчими? Гусейнов Sports.uz учун ўз қарашларини айтди.

“Оилавий масалада албатта юртимга қайтиш ниятим бор”

- Ўзбекистонга қайтиш фурсати деганда аввало шуни айтишим керакки, биринчи навбатда ота-онамнинг олдига қайтиш ниятим бор. Аммо Аллоҳ ризқимизни қаерга сочган бўлса, ўша ерда терамиз. Ўзбекистонда салкам 4 йилдан бери ўйнамаётганим сабабли у ердаги мураббийлар ва футболчилар менинг ҳозирги ҳолатимни билишмайди. Таклиф бўлиши қийин масала демайман-у, бироқ ҳозирча менга Ўзбекистондан таклифлар йўқ. Ўтган йили фақат “Сурхон”дан бор эди. Агарда Индонезияни ўзидан қизиқарли таклиф бўлса, шу ерда қоламан. Лекин оилавий масалада албатта юртимга қайтиш ниятим бор.

“Индонезияда салбийликдан ижобийлик тарафидан кўп нарсага эришдим”

- Индонезияга келиб кўплаб танишлар орттирдим. Ҳар хил миллат эгалари, мансабидан қатъий назар у агент, мураббий ёки бошқа касб эгаси бўладими, фарқи йўқ, 4 йил ичида анча-мунча танишларим кўпайди. Молиявий барқарорликка қисман эга бўлдим. Спорт томонлама айтадиган бўлсам, ҳали чемпионлик ёки Кубок эгасига айланмадим, финалда ютқазиб қўйдик. Ҳали насиб қилмаган экан. Бу йил чемпионликка ҳаракат қилиб кўрамиз. Индонезиядаги 3-4 йиллик фаолиятим мобайнида салбийдан кўра ижобийлик тарафидан кўп нарсага эришдим. Қолаверса, бу ерга келиб дунёқарашим ҳам кенгайди. Буни ҳам плюс жиҳатлардан бири деб биламан. Ўзга юртга келиб, бошқа миллат вакиллари билан суҳбатлашганингизда дунёқарашингиз ҳам кенгаяди.

“Суперлигада жамоалар ўртасидаги рақобат ўсган”

- Албатта, Суперлигамизни кўришга ҳаракат қиламан. Балки барча учрашувларни кузатишга имкон бўлмаётгандир. Чунки вақт тафовути бор. Лекин кўраётган ўйинларимдан хулоса қилсам, жамоалар ўртасида рақобат ўсган. Бироқ рақобат ўсиши билан кўп жамоалар кучайди, деб айта олмайман. Аксинча, айрим лидер клубларни ўйинида пасайиш бўлгани туфайли ўртамиёна клублар рақобатни энди ҳис қиляпти, деган фикрдаман. Аммо юқори учталикдаги рақобатни кўрадиган бўлсак, охирги 5 йиллик ичида таққосласак албатта қувонтиради. Илгари бир неча тур олдин ким чемпион бўлиши ва ким про лигага тушиб кетиши аниқ бўлиб улгурарди. 2 октябрь куни “Пахтакор” билан “Насаф” ўйнайди, кўрамиз. Финал олдидан финал. Лекин ПФЛ ўз олдига қўйган мақсадларига эришишининг тилакдошиман.

“Бошқа давлатлардан таклифлар бор”

- Айни дамда бошқа давлатлардан таклифлар бор. Аммо ҳозирча у ерларга бориш ниятим йўқ. “Борнео”да яна фаолиятимни давом эттирадиган бўлсам, албатта шу ерда қоламан. Индонезияни бошқа жамоаларидан таклифлар бўлса, биринчи бўлиб шуларни кўриб чиқаман. Аллоҳ насиб қилгани бўлади. 

“Ҳозирги ҳолатим мени тўлиқ қаноатлантиряпти”

- Маошлар ҳар хил. Аниқ суммани кўрсатиш қийин. Терма жамоа ўйинчиси бўлса кўпроқ маош олади. Кейин яна ҳар хил критериялари бор. Ҳужумчилар, ҳужум ортида ўйнайдиганлар, ярим ҳимоячилар...Ҳужумчилар билан ярим ҳимоячи ёки ҳимоячиларни таққослаганда ҳужумчилар кўпроқ маош олади. Мени ойлигимга келсак, агар бу ерда олаётган маошимни Ўзбекистонда қилиб беришганида албатта ўзимизда ўйнардим. Нима демоқчи бўлганимни тушунгандирсиз. 5-10 сўм фарқ қиладиган бўлса ҳам Ўзбекистонда ўйнашга рози бўламан. Лекин ҳозирги ҳолатим мени тўлиқ қаноатлантиряпти. Агар маошларга аниқлик киритадиган бўлсам, 5 мингдан 35 минг долларгача тафовут бор. Бу легионерларнинг даражасига боғлиқ.

"Мухлисларнинг меҳрини қозондим, деб ўйлайман"

- Индонезияда легионерларни алмаштиришини кўрган инсон сифатида айтишим мумкин, 4 йилга яқин битта жамоада тўп суриш – бу катта натижа. Бунга қандай эришдим? Албатта, ўйиним орқали. Масъулиятни тўлиқ ҳис қилиб тўп суряпман. Шунинг учун ҳам шартномани чўзиб келяпмиз ва мухлисларнинг меҳрини қозондим, деб ўйлайман.