Бу ҳужумчи ҳали “Рома” учун 100 тадан кўп гол уради

“Рома”нинг собиқ спорт директори Вальтер Сабатини Пауло Дибаланинг “Рома”даги келажаги бўйича ўз фикрларини билдирди.

Маълумки, аргентиналик юлдуз “Ювентус” билан маош борасида келиша олмагани боис янги битим тузмади ва эркин агент сифатида Жозе Моуриньо жамоасига келиб қўшилди.

- “Интер” Дибалани қўлдан чиқарганига афсусланадими? Ўйлашимча, нафақат “Интер”, балки кўп жамоалар бундан афсусда. “Рома” Пауло учун иккинчи даражали танлов эмас. Чунки римликлар ўсиш йўлидан бормоқда.

Дибала А Серияда “Рома” учун юздан ортиқ гол уришга тайёр, - деди Вальтер Сабатини.

Пауло Дибала пойтахт клубига ўтганидан бери учта гол ва иккита ассист қайд этди. Умумий ҳисобда аргентиналик ҳужумчининг А Сериядаги голлари сони 101 тани ташкил қилмоқда.