"Бу жамоага ўтганимдан афсусланмайман" - Артём Филипосян учун мавсумдаги энг яхши мураббий ва футболчи ким? Мундиал финалида қайси термаларни кўрмоқчи?

АГМК клуби ҳимоячиси Артём Филипосянни биз айтмасак ҳам ишқибозлар яхши биладилар. Тажрибали ўйинчи мавсумнинг иккинчи ярмидан олмалиқликлар сафида тўп суриб келмоқда.

У билан мавсум якунларига доир суҳбатлашишни лозим топдик. Шу билан бирга унинга яна айрим масалалардаги фикрлари билан ҳам қизиқиб кўрдик.

- Артём, бу йилги мавсумни "Сўғдиёна"дан бошлаб АГМК клубида тугатдингиз. Ушбу чемпионатда нимага эришдингиз ва нимани йўқотдингиз?

- АГМКга ўтишим мен учун кутилмаган таклиф бўлди ва бу жамоага кўчиб ўтганимдан афсусланмайман. Эришганим шу бўлдики, АГМК Осиё Чемпионлар лигасида иштирок этадиган бўлди. Табиийки, бундан жуда хурсандман. Йўқотган томоним эса бу ОФК Кубоги мусобақаси бўлди. Бундан бошқа ҳеч нарса! Аммо айтишим керакки, ўз вақтида “Насаф” билан ОФК Кубогида ғолиб чиққанман.

- Адашмасам, АГМК билан 1,5 йиллик шартнома тузгансиз. Шундай экан, келаси мавсум учун ҳам янги таклифлар борасида бош қотирмаяпсизми ёки...

- Ҳа, АГМК билан 1,5 йиллик шартнома имзолаганман. Клуб раҳбари билан ўзаро гаплашиб олганмиз. Агар яхши таклиф бўлса, келиши оламиз. Ҳозирча уйдаман, дам оляпман. Таклифлар ҳақида ўйламаяпман. Қолганини вақт кўрсатади.

артём3_1

- Бу йил "Пахтакор" яна чемпионликни қўлга киритди. Буни кутганмидингиз?

- Тўғрисини айтаман, “Пахтакор” чемпионликка фаворит эди. Чунки бу жамоада ирода кучли. “Пахтакор” ҳамиша чемпионликка даъвогар бўлиб келган.

- Сиз учун ушбу мавсумдаги энг яхши мураббий ва футболчи ким?

- Бу мавсумдаги яхши мураббий бу - Тимур Кападзе. Энг яхши футболчи эса Драган Черан.

артём4_1

- Ҳимоячи сифатида айтинг-чи, сиз учун чемпионатимиздаги энг хавфли ҳужумчи сифатида қайси футболчини айта оласиз?

- Мен учун ҳамма ҳужумчи хавфли. Лекин бу йил ҳам Драган Черан яна хавфли бўлиб чиқди. 4 йилдан бери Суперлигда тўпурар бўлиб келяпти. Қойил қолиш керак.

- Сизга кўпроқ қайси клуб ўйини ёқди?

- Менга кўпроқ “Барселона” билан “Манчестер Сити”нинг ўйинлари ёқади.

артём_2

- Ўзимизни чемпионатдан-чи?

- Ўзимиздан эса кўпроқ “Олимпик” билан “Насаф” жамоасининг ўйинлари манзур келди.

- АГМК Осиё Чемпионлар лигаси плей-оффида ўйнайди. Бу борада мақсад қандай?

- Ҳа, АГМК плей-оффда ўйнайди. Мақсад битта: гуруҳ мусобақасига чиқиш. Насиб қилса, буни уддалаймиз.

артём2_1

- Жаҳон чемпионатида ким ғолиб чиқади, деб ўйлайсиз ва ёқтирган терма жамоангиз?

- Португалия ва Аргентинага ишқибозлик қиламан. Чунки Месси билан Раналду бор. Бу икки футболчилардан бири ютса яхши бўларди. Чунки иккаласи ҳам дунёдаги энг зўрлари.

Шуҳратбек Жўраев.

 

Фикрлар

Фикр қолдириш учун авторизациядан ўтинг!
Кахрамонжон Сафаров
24/11/2022 18:04
АГМК М. Косимов бошчилигида Осиё уйинларида музкаймок еб семечка чакиб келасизлар холос чунки у ерда Миржалолни эшитадиган крахаборлар йук