"Будапешт-2024". Олимпиадада иштирок этаётган шахматчиларимиз, дастлабки турдаги натижалар ва кейинги босқичдаги рақибларимиз билан танишинг

Жорий йилнинг 11-22 сентябр кунлари Венгрия пойтахти Будапешт шаҳрида шахмат бўйича 45-Бутунжаҳон олимпиядаси бўлиб ўтади. Ушбу нуфузли турнирда Ўзбекистон терма жамоаси амалдаги чемпион сифатида ўз унвонини ҳимоя қилади.

Вақт назорати : Классик. Ҳар бир ўйин бошида ўйинчиларга 40 та юриш учун 90 дақиқа, 41-юришдан ўйин охиригача эса қўшимча 30 дақиқа берилади ва ҳар бир юриш учун 30 сония вақт қўшиб борилади. Турнир швецарча форматда 11 тур давом этади.

Турнирда мамлакатимиз шарафини йигитлар ва қизлар терма жамоаси ҳимоя қилишади.

Йигитлар терма жамоамиз аъзолари:

1. Нодирбек Абдусатторов
2. Нодирбек Якуббоев
3. Жавоҳир Синдаров
4. Шамсиддин Воҳидов
5. Жаҳонгир Воҳидов

Қизлар терма жамоамиз аъзолари:

1. Афруза Ҳамдамова
2. Нилуфар Якуббаева
3. Умида Омонова
4. Маржона Маликова
5. Нодира Нодиржонова

Олимпиаданинг биринчи турида йигитлар терма жамоамиз Тринидад & Тобаго жамоаси билан куч синашган бўлса, қизларимиз Гаити шахматчиларига қарши баҳс олиб боришди.

• Турнирдаги биринчи ғалабамиз Умида Омонова томонидан қайд этилди. У рақибаси Давена Жонетни мағлубиятга учратди.
• Дастлабки турнинг навбатдаги ғалабасида Нилуфар Якуббаева Мерисана Кадога имконият қолдирмади.
• Афруза Ҳамдамова Росе Сеине устидан зафар қучган бўлса, Нодира Нодиржонованинг ғалабасидан сўнг қизлар терма жамоамиз 4:0 ҳисобида Гаитини таслим этди.

Қизларимизнинг йирик ҳисобдаги ғалабасидан сўнг, йигитларимиз ҳам чемпионатни яхши бошлади.

• Дастлаб, Шамсиддин Воҳидов Кевин Купидни мағлуб этиб, жамоанинг биринчи ғалабаси сабабчиси бўлди.
• Қийин кечган баҳсда Нодирбек Якуббоев Қуинн Кабралис билан дуранг ўйнади.
• Навбатдаги баҳсда эса Нодирбек Абдусатторов Жошуа Жонсонни қийинчиликсиз мағлуб этди.
• Турнинг сўнгги қарама-қаршилигида Жаҳонгир Ваҳидов Рйан Ҳарперни енгиб, ғалабамизни мустаҳкамлади.

Шу тариқа икки жамоамиз ҳам турнирни ғалаба билан бошлади.

Йигитлар терма жамоамиз Тринидад & Тобагони 3.5-0.5 ҳисобида мағлуб этишган бўлса, қизларимиз мукаммал ҳисоб 4:0 билан Гаити жамоасини таслим этишди.

2-турда йигитларимиз Миср терма жамоаси билан баҳсга киришса, қизлар терма жамоамиз Ангола билан тўқнаш келади.

Иккинчи тур баҳслари соат 18:00да старт олади.

Жаҳонгир Иномжонов