Бугун ЕЧЛда "титанлар" тўқнаш келади! (Превью)

Бугун тунда Европанинг энг нуфузли турнирининг ярим финал босқичида "Манчестер Сити" Испаниянинг "Реал Мадрид" жамоасини меҳмон қилади.

Мадридликлар охирги йилларда Ла Лигадан кўра Европа чемпионлар лигасида яхшироқ ўйнаяпти. "Қироллик клуби" бу сафар ҳам кубокни Мадридга олиб кетмоқчи. Ички чемпионатда "Барселона" бирин-кетин мағлубиятлари билан "Реал" Мадридни ғолиблик шоҳсупасига олиб чиқиб қўйганидан кейин клуб энди бор эътиборини "Сити"га қарши ўйинга қаратса ҳам бўлади.

Анчелоттининг йиллар давомида тўплаган тажрибаси ҳозирги кунда унга катта наф беряпти. У футболчилар тилини жуда яхши тушунади, уларга футбол ўйнашида халақит бермайди ва уларни керагидан ортиқ руҳлантира олади. Кроос, Модрич ва Бензема каби футболчилар "Карло ота"нинг қўлида ўзининг иккинчи ёшлигини ўтказмоқда. Анчелотти Гвардиоладан фарқли ўлароқ, жуда мураккаб чизмалар ишлаб чиқмайди. У жамоага қандай ўйнаш кераклигини содда тилда тушунтиради, қолганини эса Кроос, Модрич ҳамда Бензема каби "майдондаги мураббийлар" бошқаради. "Реал"нинг ютуғи ҳам, камчилиги ҳам шу футболчилардадир.

"Реал" Мадрид биносини шу уч устун кўтариб турибди. Бугун билдирилаётган тахминларга қулоқ тутсак, меҳмонлар тарафдорлари озроқ эканлигига иқрор бўламиз. "Қироллик клуби" охирги ўйинларида катта қийинчиликларга учрамоқда, ҳар ўйин олдидан "бу сафар ютқазади", - қабилидаги фикрлар айтилишига қарамай, жамоа иродасини кўрсатиб келяпти. Ҳимоядаги камчиликлар жамоани катта ўйинларда қийин аҳволга тушириб қўйди. Лекин унутмаслигимиз лозимки, "Реал" Мадрид "Челси"га қарши баҳсда ҳам фаворит ҳисобланмаганди.

Гвардиоланинг пешонасига Мадрид шаҳри жамоалари билан жанг қилиш ёзилган экан. Аввалги босқичда Мадриднинг "Атлетико"сини ютиш учун кўп қон тўкишига тўғри келди. Лекин бу сафарги рақиб услуб жиҳатидан қулайроқ. Чунки "Реал" ҳеч қачон "Атлетико"дек бутун жамоа бўлиб ҳимояланмайди, гарчи буни хоҳласа ҳам. Пеп жамоаси билан иккита катта титул учун ҳаракат қиляпти. Агар шу иккисидан бирини танлаш керак бўлса, шак-шубҳасиз Англия премьер-лигаси рад этилади. Сабаби "Ман Сити" бу кубокни бир неча маротаба қўлга киритиб бўлди. Европа чемпионлар лигасининг бош соврини эса Гвардиола учун дарахтнинг учидаги мевадир. Пеп бу мевага кўп бора интилди. Лекин доимо охирги шоҳчага келганда сирпаниб пастга қулади. Гвардиола қўл остида ўн битта механизмдан ташкил топган машина бор. Яъни, у жамоани маълум бир футболчига боғлаб қўймаган. Агарда қайсидир футболчи жароҳат олса, унинг ўрнига, шу амплуага тўлақонли мослашган бошқа бир футболчи тушади. Умуман олганда, "Сити"да тенг кучли иккита таркиб бор ва уларнинг ҳаммаси Пепнинг услубига мослашган. Гвардиола қўл остида қисқа паслар орқали тўпни назорат қиладиган, тартибли, ҳаракатчан, 90 дақиқа бир хил темпда ҳаракатлана оладиган жамоани тузди. Агарда "Сити" бу босқичдан ўта олмаса, ўз имкониятларидан фойдалана олмаганлиги учун бўлади.

"Сити"да  реализация билан етарлича муаммолар бор. Шаҳарликлар сафида соф ҳужумчининг йўқлиги муаммонинг асл сабабидир. Бугун "Сити" яримҳимоячилари ғалаба учун кўп тер тўкишлари керак. Анчелоттининг фишкаси бўлган Модрич ҳамда Кроосга бўш ҳудудлар бермасликлари ва ҳужумдаги Карим Бенземани назардан қочирмасликлари лозим. Катта эҳтимол билан Гвардиола Бенземага қарши персонал ўйинчи қўяди. Чунки Бенземани Диаш орқали боғласа, "Реал Мадрид"нинг ҳужумлари у қадар ҳавфли тус олмайди. Диаш Бенземани қўриқлай оладиган даражада кучли ҳимоячими? "Сити"нинг яримҳимоячилари ўйин тизгинини ушлаб турадиган даражада кучлими? Гвардиоланинг тизимли жамоаси Анчелоттининг юлдузлар жамоасига қарши қандай натижа қайд этади? Буларнинг барини бугун соат 00:00да билиб оламиз!

Тахминий таркиб:

“Манчестер Сити” — “Реал”

"Манчестер Сити" (4-3-3): Эдерсон — Уокер, Стоунз, Ляпорт, Аке — де Брюйне, Родри, Гюндоган — Махрез, Фоден, Бернарду Силва Майдонга тушмайди: Жоау Канселу (дисквалификация)

"Реал" (4-3-3): Куртуа — Карвахаль, Начо, Алаба, Менди — Модрич, Каземиро, Кроос — Вальверде, Бензема, Винисиус Жуниор