Бугун Суперлигада испанча футбол кўрамизми?

Бугун Суперлиганинг 3-тури бошланади. Бекободда “Металлург” ҳамда Термизнинг “Сурхон” клублари ўзаро беллашишади.

Эътиборлиси, иккала жамоани испаниялик мураббийлар бошқаришяпти. Биласиз, “Металлург”да Луисма Эрнандес, “Сурхон”да эса Анхель Лопес бош мураббийлик қилмоқда.

Бу эса ўзига хос жангга айланиши шубҳасиз. Чунки икки испаниялик мутахассислар Ўзбекистон чемпионатида рўбаро келадилар. Демак, бугун Суперлигада испанча футбол кўрамиз, чоғи.

Ўтган турда “Металлург” Қаршида “Насаф” билан дуранг ўйнагач, Sports.uz мухбирига берган интервьюсида “Сурхон”даги ҳамкасби Лопес борасида қуйидагиларни айтганди:  

- “Сурхон”нинг бош мураббийини шахсан танимайман. Лекин иккимизни ўртамизда умумий танишлигимиз бор. Умуман олганда, клуб ва мураббий ҳақидаги фикрим жуда ҳам ижобий. Ўйиндан кейин ҳам барчаси жуда яхши бўлиб қолишини истаб қоламан”, - деганди Эрнандес.

Биласиз, “Металлург”дан фарқли ўлароқ “Сурхон” клуби чемпионатни муваффақиятли бошлай олмади. Боиси, Анхель Лопес жамоаси дастлабки иккита турда мағлубиятга учраган ҳолда мухлисларини ранжитиб қўйди. “Металлург” бўлса, бир ғалаба ва бир дуранг қайд этди. Бу сафар Лопес “Сурхон” билан қандай натижа кўрсатаркин? Буни бугун биргалашиб кузатамиз.  

"Металлург" устози Қаршидаги дуранг ҳақида: "Тактик жиҳатдан бу мен учун ғалаба" - Эрнандес билан ҳазиллашманг!