Буларга мундиал армон! Жаҳон чемпионатига бормайдиган энг қиммат футболчилар жамоаси тузилди

Футбол статистикасига ихтисослашган Transfermarkt портали 2026 йилги жаҳон чемпионатида майдонга тушмайдиган энг қиммат футболчилардан тузилган рамзий жамоани эълон қилди. Ушбу шартли таркибнинг умумий бозор қиймати 875 миллион еврони ташкил этади. Бу футболчилар турнирдан ўз терма жамоалари саралашдан ўтолмагани, жароҳатлар ёки мураббийлар қарорлари сабабли четда қолган.

Рамзий жамоада энг кўп ўринни Италия футболчилари эгаллади. Дарвозабон Жанлуижи Доннарумма (45 миллион евро) бошчилигида тўрт нафар ҳимоячи жаҳон чемпионатини телевизор орқали кузатишга мажбур. Италия терма жамоаси саралаш босқичидан ўта олмагани боис уларнинг бирортаси катта турнирда иштирок этмайди.

Жаҳон чемпионатида ўйнамайдиган футболчилар орасида энг қиммат ўйинчи сифатида Грузия терма жамоаси вингери Хвича Кварацхелия қайд этилган. Унинг бозор қиймати 140 миллион еврога баҳоланган. Шунингдек, 2026 йилги мундиалга бормайдиган энг қиммат учликка Англия яримҳимоячиси Коул Палмер ва Испания футболчиси Фермин Лопес ҳам кирган — ҳар бирининг қиймати 100 миллион евродан.

Турнирда иштирок этмайдиган юлдузлардан тузилган рамзий жамоа қуйидагича шакллантирилган:

Дарвозабон: Жанлуижи Доннарумма (Италия, 45 миллион евро).

Ҳимоячилар: Федерико Димарко (Италия, 50 миллион евро), Риккардо Калафьори (Италия, 55 миллион евро), Алессандро Бастони (Италия, 65 миллион евро), Юрриен Тимбер (Нидерландия, 70 миллион евро).

Яримҳимоячилар: Доминик Собослаи (Венгрия, 100 миллион евро), Фермин Лопес (Испания, 100 миллион евро), Коул Палмер (Англия, 100 миллион евро), Хвича Кварацхелия (Грузия, 140 миллион евро).

Ҳужумчилар: Беньямин Шешко (Словения, 75 миллион евро), Виктор Осимхен (Нигерия, 75 миллион евро).