"Бунёдкор" майдонида ОКМК аллақачон ноқулай рақибга айланган, чунки...

Суперлиганинг 15-тур учрашуви бугунги иккита ўйин орқали якунига етказилади. Иккаласи ҳам Тошкентда ўказилади. “Бунёдкор” ОКМК билан, “Олимпик” эса “Сўғдиёна”га қарши. Биз “Бунёдкор” стадионида бўладиган баҳсга эътиборингизни қаратмоқчимиз.

Ўтган турда “Бунёдкор” уйида “Сўғдиёна”га 0:2 ҳисобида енгилди. ОКМК эса “Сурхон”га 2:3 натижаси билан мағлубиятга учради. Демак, иккита яраланган шер ўртасида бугун чинакам жанг кўрамиз.

“Бунёдкор”га яқинда россиялик Александр Крестинин бош мураббий этиб тайинланди. Яхши мутахассис. Аммо дебютини мағлубият билан бошлашига тўғри келди. У жамоани ўзининг услубига мослаштириб олиши учун вақт талаб қилиниши тайин. Балки шунинг фонида ўтган турда рақибга имконият бой берилгандир. Аммо бу сафар ҳам “қалдирғочлар”ни жиддий синов кутяпти.

Ўзи аслида Суперлигада сира осон ўйинлар қолмаган. Табиийки, Крестинин “Бунёдкор”нинг натижаларини яхшилаши учун анча тер тўкишига тўғри келади. Раҳбарият ва мухлислар ундан натижа талаб қилишаётгани тушунарли. Янги бош мураббий янги жамоасида ҳам тезроқ илк ғалабани нишонлаш иштиёқида юрибди. Бу ёқда АГМКни ўзига ҳам уч очко ниҳоятда зарур. Акс ҳолда йўқотилган ҳар бир очко Миржалол Қосимов жамоасини совринли ўринлардан узоқлаштираверади.

Кеча “Насаф”нинг “Турон”га ютқазиб қўйгани олмалиқликлар учун айни муддао бўлиши мумкин. Агар бугун ОКМК уч очкони қўлга киритишни уддалай олса, турнир жадвалида “Насаф”ни ортда қолдиради ва 4-поғонага чиқиб олиши мумкин.

Иккала жамоа ўйинлари статистикаси ҳам қизиқ рақамларни тақдим этмоқда. Улар 31 марта тўқнашишган. Устунлик “Бунёдкор” томонида. 17 марта ғолиб чиққан, ОКМК эса 7 марта. Яна 8 та қарама-қаршиликда кучлар тенг келиб қолган. Тўплар нисбати эса табиийки “Бунёдкор” фойдасига 49\33.

“Бунёдкор” ўз майдонида ОКМКга қарши охирги бешта ўйиндан бери ютолмаяпти. Сўнгги маротаба 2017 йили рақибини 1:0 ҳисобида мағлубиятга учратган. Кўриб турганингиздек, олмалиқликлар учун “Бунёдкор” майдонида мезбонларга қарши ўйнаш анча қулай, шекилли. Боиси, ОКМК 3 ғалаба ва 2 дурангга эришган.

Бу йилги мавсумнинг биринчи даврасидаги тўқнашувда “Бунёдкор” “Пахтакор” стадионида ОКМК мезбонлигдаги учрашувда 3:2 ҳисобида ғалаба қозонганини билсангиз керак. Устига-устак ОКМК ўтган турда кутилмаганда “Сурхон”га 2:3 ҳисобида мағлуб бўлди. Бу йўқотилган очколар эса медаллар учун курашаётган жамоага мавсум охирида панд бериши мумкин.

Хуллас, бугун, яна бир нечасоатдан кейин “Бунёдкор” ва ОКМК иштирокида жиддий ва муросасиз ўйин гувоҳига айланамиз.

Шуҳратбек Жўраев.