“CAFA Nations Cup 2025”: Ҳусановнинг бир ўзи Эрон терма жамоасидан қиммат туради!
Ўзбекистон ва Тожикистон майдонлари футбол бўйича “CAFA Nations Cup 2025” халқаро турнирининг гуруҳ беллашувларига мезбонлик қилмоқда.
Ўзбекистон, Қирғизистон, Туркманистон ва Ўмон миллий терма жамоаларидан таркиб топган “А” гуруҳи ўйинлари Тошкент шаҳрида ўтказиляпти. Эрон, Афғонистон, Ҳиндистон терма жамоалари Тожикистонда меҳмон бўлиб турибди.
Sports.uz портали турнирга оид қизиқарли маълумотларни футбол ишқибозлари эътиборига ҳавола этади.
Бу мусобақада жами саккиз мамлакат та терма жамоалари қатнашяпти ва иштирокчиларнинг умумий нархи 127,35 миллион еврони ташкил қилади. Бироқ терма жамоалар ўртасидаги нарх фарқи жуда катта.
Ўзбекистон – асосий фаворит
Ўзбекистон турнирда энг қиммат таркибга эга жамоа. Унинг умумий суммаси 67,48 миллион еврони ташкил қилади. Таркибнинг асосини Европа клубларида ўйнаётган кучли футболчилар ташкил қилади. Мутахассислар бу жамоани ғолиблик учун асосий даъвогар сифатида эътироф этмоқда.
Ўзбекистоннинг етакчи ўйинчилари:
Абдуқодир Ҳусанов – 35 миллион евро, Аббосбек Файзуллаев – 8 миллион евро; Элдор Шомуродов – 5 миллион евро; Остон Ўрунов – 2 миллион евро; Отабек Шукуров – 1,8 миллион евро.
Эрон – чемпионликка доимий даъвогар
Терма жамоаларнинг нархи бўйича иккинчи кўрсаткич Эрон терма жамоасига тегишли. Форслар 26 миллион еврога баҳоланяпти. Бу терма жамоа жаҳон ва Осиё чемпионатларида мунтазам қатнашиб келади.
Эътиборли жиҳати, Абдуқодир Ҳусановнинг трансфер суммаси қитъадаги энг қудратли терма жамоалардан ҳисобланган Эронникидан 9 миллион еврога қиммат туради.
Эроннинг энг қиммат ўйинчилари:
Меҳди Тареми – 3,5 миллион евро; Хуссейн Канаани – 1,8 миллион евро; Саман Ғоддос – 1,5 миллион евро; Алиреза Жаҳонбахш – 1,5 миллион евро; Амирхусайн Хуссайнзода – 1,5 миллион евро.
Ўмон – ўртамиёна жамоа
Ўмон иштирокчилар орасида жамоанинг умумий нархи бўйича учинчи ўринда. Тажрибали ўйинчилар ва ёшларни жамлаган таркиб 9,95 миллион еврога баҳоланяпти.
Ўмон терма жамоаси етакчилари:
Муҳсин Ал-Ҳассани – 1 миллион евро; Эссам Ас-Субҳий – 500 минг евро; Дахман – 500 минг евро.
Тожикистон – келажак жамоаси
Тожикистон терма жамоасининг умумий нархи 7,93 миллион еврога баҳоланган ва мураббийлар асосан маҳаллий ўйинчилар ва айрим легионерларга таянади. Бу жамоа ўз салоҳиятини кўрсата бошлаган ва энди халқаро майдондаги мавқеини кўтаришга ҳаракат қиляпти.
Тожикистоннинг энг қиммат ўйинчилари:
Рустам Ятимов – 1,5 миллион евро; Парвиз Умарбоев – 600 минг евро; Зоир Жўрабоев – 600 минг евро; Эҳсон Панжшанбе – 600 минг евро; Алишер Жалилов – 500 минг евро.
Қирғизистон – ўта тартибли жамоа
Қирғиз Республикаси терма жамоасининг нархи 6,65 миллион еврони ташкил қиляпти. Бу жамоа тартибли ўйини билан ном қозонган ва ҳар қандай рақибга сюрприз тайёрлай олади.
Қирғизистоннинг етакчи ўйинчилари:
Жоэл Кожо – 600 минг евро; Гулжигит Алиқулов – 600 минг евро; Тамирлан Козубаев – 450 минг евро; Кристиан Браузман – 450 минг евро.
Ҳиндистон – катта тажриба эгаси
Дунёда аҳолиси энг кўп икки мамлакатдан бири ҳисобланган Ҳиндистоннинг терма жамоаси 5,38 миллион еврога баҳоланган. Ҳиндлар рақибларни жамоавий ўйин орқали енгишга уринадиган жамоа.
Ҳиндистоннинг энг қиммат ўйинчилари:
Лаллинзуала Чханте – 350 минг евро; Сандеш Жинган – 300 минг евро; Суреш Сингх – 300 минг евро; Анвар Али – 300 минг евро.
Туркманистон – барқарорликни кўзлаган жамоа
Марказий Осиёнинг бу жамоаси 2,53 миллион еврога баҳоланган. Туркманлар курашувчанлиги билан ажралиб туради ва ҳар қандай жамоага қарши ўйнай олиши мумкин.
Туркманистон терма жамоаси етакчилари:
Алтимурод Аннадурдиев – 200 минг евро; Гуйчмират Аннагулиев – 175 минг евро; Абди Бяшимов – 175 минг евро.
Афғонистон – вақтинчалик аутсайдер
Афғонистон терма жамоаси 210 минг еврога баҳоланган. Бу мамлакатда ҳали профессионал футбол тўлиқ шакллангани йўқ. Мамлакатнинг энг қиммат ўйинчиси Рмат Акбари 150 миллион еврога баҳоланган.
Энг қизиқ фактлар:
Ўзбекистон миллий терма жамоаси Афғонистондан 320 марта қиммат туради;
Ўзбекистон ва Эрон терма жамоаларининг умумий нархи 93,5 миллион еврога тенг бўлиб, қолган олти жамоани қўшиб ҳисоблаганда ҳам улардан кўп.
Абдуқодир Ҳусановнинг бир ўзи бутун Эрон миллий терма жамоасидан 9 миллион еврога қиммат баҳоланган.
Трансфер суммаси 8 миллион еврога тенг бўлган Аббосбек Файзуллаевнинг бир ўзи Тожикистон, Қирғизистон, Ҳиндистон, Туркманистон ва Афғонистон таркибларидан қиммат.
Фикрлар