Чарльз Оливейра ва Бенеил Дариуш жангида ким ғалаба қозонади? ( Сўровнома)

Хабарингиз бор 11 июнь тонгида Канаданинг Ванкувер шаҳри “UFC 289” турнирига мезбонлик қилади. Маразий жанг аёллар ўртасида Аманда Нуньес ва Ирен Алдана ўртасида ўта енгил вазн (61.2 кг) тоифаси чемпионлиги учун бўлади. Бироқ, барчанинг диққат эътибори иккинчи марказий жангга қаратилади, десак янглишмаган бўламиз. Сабаби, енгил вазн (70.3 кг) тоифасидаги собиқ чемпион Чарльз Оливейра дивизионнинг яна бир ТОП жангчиси Бенеил Дариушга қарши октагонга кўтарилади. Албатта, ушбу тўқнашув борасида бутунжаҳонда турли хил фикрлар янграмоқда. Биз ҳам ҳар доимги анъанага мувофиқ ўзбек ММА олами вакилларининг ушбу жанг борасидаги фикрлари билан қизиқдик.

Валижон Азимов – Ўзбекистон ММА ассоциацияси Сурхондарё вилояти бўлими раиси

- Икки ёрқин жангчининг тўқнашуви бўлади. Бир-биридан сира қолишмайдиган жангчилар бизга чиройли ва шиддатли баҳсни тақдим этади, деб ўйлайман. Икки “партер” усталари учун бу баҳс осон бўлмайди. Дариушнинг “стойка”си мустаҳкам, зарбалари оғир ва кураши кучли, Оливейрани қийнаб қўяди. Бироқ, Оливейра Махачев билан реванш сўраган ва бу жангга борини беради. Назаримда Оливейра ғалаба қозонса керак.

Мансур Тўғизбоев – мураббий

- Бу жангда Чарльз Оливейранинг имконияти жуда юқори, деб ўйлайман. Баҳс охирига қадар давом этмаслиги аниқ. Оливейра муддатидан аввал ғалабани қўлга киритади. Албатта, бу менинг шахсий фикрим.

Фарруҳ Мадаминов – мураббий

- Жуда қизиқ жанг бўлади. Икки тенг кучли жангчилар учун жуда муҳим тўқнашув. Менимча Оливейра бу баҳсда фаворит. У Махачевга бой берилган имкониятдан сўнг, тайёргарликни жуда қаттиқ олиб борди, деб ўйлайман. У жангда ғалаба қозонса керак.

Жасур Алижонов –мураббий

- Тўғриси, бу жанг менга ҳам жуда қизиқ. Назаримда Оливейра бу жангда ғалаба қозонади. Бироқ, Дариуш ҳам оддий жангчи эмас. Унинг “стойка”си ва кураши жуда яхши шаклланган. Оливейра ютади дейишимга сабаб, аввалги жангда мағлубиятга учраганлиги учун ҳам унда мотивация юқори. Қолаверса, жуда яхши жисмоний ҳолатга эга. Тайёргарликни ҳам яхши олиб борди. Энди, бу менинг шахсий фикрим. Барчаси октагонда ҳал бўлади.

Мавлон Мавлонов – мураббий

- Очиғи, бу жангни интиқлик билан кутяпман. Сабаби, мен учун энг мукаммал, хақиқий гладиаторлар жанги бўлади. Бу жангда ким ютиши Оливейранинг руҳий тайёргарлигига боғлиқ бўлади. Оливейра руҳий жиҳатдан тайёр бўлган вақтда, уни хеч ким тўхтатиб қололмаган. Ўша Дастин Порье, Жастин Гэтжиларга қарши ютқазаётган вақтда ҳам ғалабани илиб кетган. Мен Дариушни камситмоқчи эмасман. Дариуш ҳам “стойка”да жуда журъатли жангчи саналади. Нокаутлари ҳам бор, “партер”да ҳам жуда яхши. Дариуш Оливейрани сабмишен қилишига ишонмайман. “Лаки панч” эвазига Дариуш ғалаба қозониши мумкин. Имкониятларни 70/30 деб баҳолаган бўлардим. Албатта, Оливейра фойдасига!

Ҳумоюн Ибрагимов –ММА жангчиси

- Яхши ва томошабоп жанг бўлади. Менимча Чарльз Оливейра бу жангни 2-раундгача тугатса керак. Бразилиялик жангчи Дариушга нисбатан ҳар томонлама универсалроқ, деб ўйлайман.

Достон Бозоров –ММА жангчиси

- Бир-бирига мос рақиблар. Тўғри, Чарльз Оливейра мағлубиятдан кейин яхши тайёргарлик кўрмоқда. Бироқ, Дариуш ажойиб ғалабали серияга эга ва у чемпионлик йўлида астойдил ҳаракат қилмоқда. У чемпионлик мазасини тотиб кўргани йўқ. Оливейра эса чемпион бўлган. Мен Дариуш ушбу жангда ғалаба қозонади, деб ўйлайман. Дариушнинг курашдан ҳимояси ҳам зўр. Қолаверса, зарба ҳам кўтаради. Дариуш Оливейрадан ўтиб, Махачевга ҳам катта муаммо бўлади. Албатта, бу менинг фикрим!

Рамазон Темиров – ММА жангчиси

- Енгил вазн тоифасидаги ТОП жангчиларнинг тўқнашуви мухлисларни асло зериктириб қўймаса керак. Бу жанг шуниси билан муҳимки, ғолиб чемпионлик камари учун жанг олиб бориш имкониятини қўлга киритади. Шунинг учун жуда қизиқарли тўқнашувни гувоҳига айланамиз. Дариуш ҳам зўр жангчи. Бироқ, Оливейра бу жангда ғалаба қозонса керак.