“Челси”, интизомсиз ўйинчинг бизга керак эмас, олиб кет!

Лондоннинг “Челси” клуби ҳужумкор ярим ҳимоячиси Кендри Паэс ижара асосида “Ривер Плейт” сафида ўйнаётган бўлса-да, муддатидан аввал Лондонга қайтиши мумкин.

Журналист Ренсо Пантич маълумотига кўра, Аргентина клуби ижара шартномасини бекор қилиш масаласини жиддий кўриб чиқмоқда, чунки жамоа мураббийини ёш эквадорлик ўйинчининг хатти-ҳаракати умуман қониқтирмаяпти.

Мураббийнинг фикрича, 19 ёшли футболчи машғулотларда етарлича меҳнат қилмаяпти. Шунингдек, интизом бузилиши бўйича ҳам эътирозлар мавжуд.

“Ривер Плейт” Кендри Паэсни жорий йил январь ойида “Челси”дан ижарага олган эди. Битим келаси йилнинг ёзигача амал қилиши белгиланган.

Аввалроқ футболчи Франциянинг “Страсбург” клубида ҳам ўзини синаб кўрган, аммо кутилган таассуротни қолдирмаганидан кейин Аргентинага юборилган эди.