Чемпионлар Лигасидаги машаққат билан эришилган 5 ғалаба

Футбол олами танаффусда. Коронавирус сабаб барча чемпионатлар вақтинчалик тўхтатилган. Телевизорда ҳам аввалги ўйинлар намойиш этилмоқда.

Келинг, биз ҳам Чемпионлар Лигасидаги чиройли ғалабаларни ёдга оламиз.

“Челси” – “Барселона” (ярим финал, 2012)

Barsa Chelsi

Ўша вақтлар “аристократлар”нинг вақтинчалик мураббийи Роберто Ди Маттео эди. Қандайдир мўжиза сабаб “Челси” “Барселона” устидан 3:2 ҳисобида ғалаба қозонди. Иккала ўйинда ҳам “Челси” тўп назорати бўйича анча паст кўрсаткич намойиш этганди (уйда 28%, меҳмонда 27%)  Шунинг учун каталонияликлар Лондонда рақиб дарвозасига 6 та зарба бера олган бўлса, “Камп Ноу”да эса 5 та зарба берган. Жавоб ўйинида Лео Месси пеналтидан унумли фойдалана олмаган эди. Келинг, ўша ўйинни эсда қолган вазиятлари ҳақида суҳбатлашамиз.

“Барса” Серхио Бускетс ва Андрес Иньестанинг голлари эвазига олдинга чиқиб олган эди. Умумий ҳисоб 2:1. Лекин бу жуда қалтис ҳисоб эди. “Челси” курашишда давом этди ва Рамиреснинг голи умумий ҳисобни тенглаштирди. Бу гол меҳмонда урилгани эвазига лондонликларга кейинги босқичга чиқишга ёрдам берарди.

Аммо Гари Кэхиллнинг жароҳат олиши, Жон Террининг қизил карточка олиши “Челси”нинг марказий ҳимоячиларсиз ўйнашига сабаб бўлди.

Ҳалигача “Челси” 10 киши бўлиб “Барселона”ни тўхтатиб қолгани муҳокамаларга сабаб бўлади. Бу омадмиди? Ғалаба бўлган ишончмиди? Ҳар ким ҳар хил хулоса қилади.

Ўйин охирида эса Фернандо Торреснинг голи “Челси”ни олдинга олиб чиқди. Ўша ўйинда бир кишини қаҳрамон деб кўрсатиб бўлмайди. Бутун бошли жамоа бирдамликда ҳаракат қилди.

“Интер” – “Барселона” (ярим финал, 2010)

Inter

Жозе Моуриньонинг “Интер”и “Барселона”ни Чемпионлар Лигаси ярим финал босқичида тўхтатиб қолди. Португалиялик мутахассиснинг фаолиятидаги ажойиб ғалабалардан бири. Лекин жамоа таркибида ҳам жуда кўп юлдузлар бор эди. Дарвозада – Жулио Сезар, қанотларда Майкон ва Хавьер Занетти, марказда Лусио,Вальтер Самуэль ва Марко Матерацци. Ярим ҳимояда Эстебан Камбьяссо ва Тиаго Мотта, ҳужумда эса Уэсли Снейдер, Самюел Этo’о ва Диего Милитолар бор эди.

Моуриньо қўл остидаги ажойиб таркибдан қандай фойдаланишни билар эди. Биринчи ўйинда қарши ҳужумда ўйнаб, 3:1 ҳисобида ғалаба қозонганди. Снейдер, Майкон ва Милитонинг голига “Барселона” Педронинг голи билан жавоб берган эди.

Биринчи ўйинда каталонияликлар 71% тўпга эгалик қилган бўлса, иккинчи ўйинда бу кўрсаткич 86%га ошди. Сезар дарвозаси томон 20 та зарба берилди.

Лекин “Интер” мустаҳкам ҳимояланди. Тиаго Мотта қизил карточка олиб чиқиб кетгандан сўнг, ҳимоявий ўйин янада кучайди. Миланликлар “Барселона”ни ярим финалда қолдириб финалда йўл олишди.

Финалда эса уларни “Бавария” кутиб турарди.

“Челси” – “Бавария” (финал, 2012)

Chelsi

“Барселона” устидан кутилмаганда ғалаба қозонилгач, “Челси” финалда Юпп Хайнкеснинг “Бавария”сига дуч келди.  

Бу сафар ҳам англияликлар тўп назорати борасида рақибга устунликни бой берди. “Бавария” 64% тўп назоратига эга бўлиб, дарвоза томон 17 та зарба берди, улардан 6 таси аниқ. “Челси” эса 3 та зарба берди ва 3 та зарба ҳам аниқ.

Немислар ўз уйларида ўйнаётган эди ва табиийки, ҳамма уларни фаворит деб ҳисобларди. Жамоа таркибида ҳам жуда кўп юлдузлар бор эди. Марио Гомеснинг ўзи Чемпионлар Лигасида 12 та гол урган эди. Лекин негадир финалда унинг иши юришмади. 83 дақиқада Томас Мюллер ҳисобни очган бўлса, орадан кўп вақт ўтмасдан Хуан Матанинг бурчак зарбасидан оширган тўпини Дидье Дрогба дарвозага жойлаб, ҳисобни тенглаштирди.

Қўшимча бўлимларда Арьен Роббен пенальтидан унумли фойдалана олмади. Петр Чех дарвозаси ишғол қилинмади. Ва ўйин пенальтилар сериясигача борди. Дидье Дрогба ғалаба голини киритиб қаҳрамон бўлган бўлса, Петр Чех Олич ва Шванштайгернинг зарбасини қайтариб қаҳрамонга айланди.

“Атлетико” – “Бавария” (ярим финал, 2016)

ATM

Диего Симеоненинг “Атлетико”си финалда “Реал” билан ўйнади. Унгача эса ярим финалда “Бавария” билан бўлган ўйин ҳам ҳаяжонга бой бўлганди. Умумий ҳисоб 2:2 ва меҳмондаги гол эвазига мадридликлар финалга чиққан эди.

Биринчи ўйин Гвардиола шогирдлари 74%  кўрсаткич билан тўп назоратини қўлга олган эди. Аммо “матрасчилар” Саулнинг голи эвазига ўз уйларида ғалаба қозонишди.

Жавоб ўйини эса янада қизиқарли бўлди. Немислар 33 марта дарвозага зарба беришган бўлса, улардан 11 таси аниқ эди. Мадридликлар 4 марта рақиб дарвозасини безовта қилишди ва улардан биттаси гол билан якунланди. Антуан Гризманнинг голига Хаби Алонсо жарима зарбасидан гол уриб, жавоб қайтарди.

Роберт Левандовски ҳам ўз ҳисобига гол ёздириб қўйди ва умумий ҳисоб 2:2 кўринишга келди. Аммо “Атлетико” меҳмондаги гол эвазига финалга чиқди.

“Барса”даги сингари “Бавария”да ҳам Гвардиола тўп назоратига кўпроқ эътибор қаратди. Лекин Симеоненинг қарши ҳужумга асосланган тактикаси устун келди.

“Атлетико” – “Ливерпуль” (плей-офф, 2020)

Liverpul

Йиллар ўтаверади, аммо “Атлетико” ўзгармайди. Диего Симеоне қарши ҳужумга асосланган тактика исталган кучли рақибни ҳам тўхтатиб қолиши мумкинлигини яна бир бор исботлади.

“Ванда Метрополитано”да бўлиб ўтган биринчи ўйинда “Атлетико” ҳар томонлама устунликка эришди. Саулнинг голи эвазига олдинга ҳам чиқиб олишди. “Ливерпуль” футболчилари 7 та зарба берган бўлса, бирортаси ҳам Облакни безовта қила олмади.

Жавоб учрашувида эса умумий ҳисобда 3:2 билан “матрасчилар” кейинги босқичда чиқишди. “Қизиллар” 35 маротаба зарба берди ва улардан 12 таси аниқ зарбалар эди. Бу “Атлетико”нинг энг яхши ўйини эмас, бундан ҳам яхши ўйинларда иштирок этишган. Лекин улар амалдаги чемпионни тўхтатиб қолишди.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)