"Четдан расмий таклифлар келди, биз "Динамо"га ваъда бериб бўлгандик, клубга ўтишимга Абрамов 99 фоиз сабабчи" - Одил Абдумажидов

Куни кеча Самарқанднинг “Динамо” клуби ўз сафини иқтидорли футболчи Одил Абдумажидов билан тўлдирди.

Ўтган мавсумни “Олимпик”да ўтказган ўйинчи энди “Динамо” шарафини ҳимоя қилади ва асосий эътиборини янги клубига қаратган. Sports.uz журналисти Абдумажидовдан интервью олди.

- Аввало, "Динамо"га ўтишингиз ҳақида сўрамоқчиман. Бу қандай юз берди?

-   “Динамо”дан қўнғироқ бўлди, гаплашдик. Кейин агентларимни рақамини бердим. Барча масала бўйича гаплашиб, келишиб олишди. Яхши вариант бўлиб, таклиф қилишгани учун бу амалга ошди. Мақсадлар бир-бирига тўғри келгани учун келишув юз берди.

- Нега айнан "Динамо"ни танладингиз? Чунки сизда четдан ҳам вариантлар бор эди...

- Рости, Ўзбекистон чемпионатида қолиш ниятим йўқ эди. Четдан менга расмий таклиф билан чиқишди. Фақат уларда трансфер ойнаси очилмай қолгани сабабли вақт чўзилиб кетди. Агентларим ҳам бошида мени хорижга кетишимни айтишганди. Унгача “Динамо” чақирувини инобатга олиб, жамоа йиғинига қўшилдим. У пайтда эса мен ва агентларим “Динамо”га сўз бериб қўйгандик, қўл ташлашдик. Кейин четдан иккита клубдан расмий таклиф тушди, шартнома жўнатишди. Лекин кеч қолишди. Биз “Динамо”га ваъда бериб бўлгандик.

- Ҳа, сиз "Динамо"га барвақт қўшилгандингиз. Чунки БААдаги йиғинида ҳам қатнашдингиз ва яқиндагина шартнома туздингиз. Орада нега “пауза бўлгани юқоридаги жавоб билан боғлиқми?

- Орада “Металлург” билан шартномам борлиги сабабли аввал йиғинга бориб келавер, кейин гаплашиб олаверамиз дейишгани учун бориб келдим.

- "Динамо" илк турни Наманганда "Навбаҳор"га қарши ўтказади. Сиз буни кутганмидингиз ёки...

- Бошида учта турда чемпионлик учун курашадиган клублар билан ўйнаймиз. Бир томондан бошида улар билан ўйнашимиз қизиқ. Худо хоҳласа, яхши бўлади.

-. "Динамо"да қайси рақамни танладингиз ва рақамни сиз учун аҳамияти борми?

- Рақамни фарқи йўқ. Ўтган йили 4-рақамда тўп сурдим. Кўпроқ шу рақамда тўп сураётганим учун бу ерда ҳам 4 ни олдим.

- “Динамо” устози Вадими Абрамов ҳақида фикрингиз қандай, илк суҳбатда нималар деди?

-  “Динамо”га ўтишимга 99 фоиз Абрамов сабаб бўлди. Чунки у Ўзбекистондаги энг кучли мураббийлардан бири. Футболи ҳам яхши. Тактикалари ёқади. Биринчи қўнғироқ қилганида ўзи билан гаплашдим. Мақсадлари ҳам менга ёқди.

Шуҳратбек Жўраев.