Чирчиқда Ўзбек жанг санъати бўйича Ўзбекистон чемпионати ўтказилди

Жорий йилнинг 5-8 март кунлари Чирчиқ шаҳридаги Ўзбекистон давлат жисмоний тарбия ва спорт университети манежида миллий спорт туримиз саналган Ўзбек жанг санъати бўйича ўсмирлар, ёшлар ва катталар ўртасида Ўзбекистон чемпионати беллашувлари бўлиб ўтди.

Мазкур мамлакат чемпионатида  Қорақалпоғистон Республикаси,  Тошкент шаҳри ва барча вилоятлардан 2000 нафарга яқин атлетлар иштирок этиб, "Комплекс машқ", "Темурийлар жанг усули" "Кўргазмали чиқиш" ва "Ассалом тонг" йўналишлари бўйича маҳоратларини намойиш этишди.

Чемпионат доирасида шунингдек,  8 март- Халқаро хотин-қизлар байрами муносабати билан  Ўзбек жанг федерацияси томонидан бир гуруҳ ҳакамлардан иборат хотин -қизлар эътироф этилиб, муносиб тақдирланди. Юқори савияда ўтган мазкур байрамга бағишланган тақдирлаш маросимида  Ўзбекистон давлат жисмоний тарбия ва спорт университети ректори Рашид Маткаримов ҳамда Ўзбек жанг санъати федерацияси раиси Пўлат Усмонов иштирок этди. 

Шу тариқа уч кун давом  этган муросасиз беллашувларнинг якуний натижаларига кўра умумжамоа ҳисобида биринчи ўринни Тошкент вилояти терма жамоаси қўлга киритди. Иккинчи ўринни андижонлик Ўзбек жанг санъати усталари эгаллашган бўлса, учинчи ўрин Тошкент шаҳар спортчиларига насиб этди. 
Таъкидлаш жоиз, ушбу мамлакат чемпионати 3-5 апрель кунлари Ўзбек жанг санъати бўйича Қозоғистоннинг Чимкент шаҳрида ўтадиган Осиё чемпионатига саралаш вазифасини ўтаб берди. 

                                                                                                                  Илҳом РАҲМОНОВ тайёрлади