Даҳшат! Роналду янги шартнома бўйича қанча пул топиши ошкор бўлди

Жаҳон футболи тарихида расмий учрашувларда энг кўп гол урган португалиялик юлдуз Криштиану Роналду Саудия Арабистонининг “Ан-Наср” клуби билан яна икки йиллик шартнома имзолади.

Нуфузли манба – The Sun экспертлари 40 ёшли тўпурарнинг янги битим бўйича кейинги икки йил давомида қанча маблағ ишлаб топишини ҳисоблаб чиқди.

Ҳисоб-китобларга қараганда, Роналду шайхлар билан ҳамкорлик давомида 492 миллион фунт стерлинг (575,64 миллион евро) миқдорида даромад кўриши кутилмоқда.

Унинг “Ан-Наср”да ўйнаётгани учун йиллик маоши 178 миллион фунтни ташкил қилади. Ҳужумчи бунга қўшимча тарзда 24,5 миллион фунт бонус олади. Агар у иккинчи йили ҳам клубда қоладиган бўлса, бу бонас 38 миллион фунтга оширилади.

Бундан буён Криштиану Роналду “Ан-Наср” клубининг 33 миллион фунтга баҳоланаётган 15 фоиз акциясига эгалик қилади. Навбатдаги мавсумда Роналду Саудия Арабистони Профессионал лигасининг тўпурар баҳсида ғолиб чиқиб, “Олтин бутса”ни қўлга киритса, унга 4 миллион фунт миқдорида мукофот пули олади. Клуб Роналду бошчилигида мамлакат чемпиони бўлган тақдирда унга 8 миллион фунт бонус тўланади.

Саудия Арабистони компаниялари билан тузиладиган ҳомийлик шартномалари португалиялик юлдузнинг даромадларига яна 60 миллион фунт қўшиши кутиляпти.

Роналду Риёд шаҳрида ўзини қулай ҳис қилиши учун унга жами 16 нафар ходим, учта ҳайдовчи, тўртта хизматчи, иккта ошпаз, учта боғбон ҳамда тўрт нафар қўриқчи хизмат кўрсатади.

Энг муҳими эса, Криштиану Роналдуда турли бонуслар ҳисобига кўрсатилган маблағлардан ташқари қўшимча даромад олиш имконияти ҳам берилган.