Даврон Файзиев:

“Бухоро” жамоасида мураббийлар борасида юз бераётган турли гап-сўзларга чек қўйиш илинжида клуб матбуот хизмати амалдаги бош мураббий Даврон Файзиев билан вазиятга ойдинлик киритиш мақсадида суҳбат уюштирди.

- Жамоанинг навбатдаги Бухорода ташкил этилган йиғинида иштирок эта олмадингиз, бу эса мухлислар орасида турли миш-мишларнинг пайдо бўлишига сабаб бўлди. Шу хусусида ойдинлик киритиб ўтсангиз.

- Гапимни қисқача қилиб айтсам, менда жамоани тарк этиш нияти бўлмаган, раҳбарият билан яхши алоқадаман. Мана шу вақтлар ичида оилавий муаммолар бўлиб ўтди, яъни, онамнинг бироз мазаси бўлмай қолди. Биласиз, яқинда “ПРО” лицензияси ўқув-курсларининг якуний босқичи бўлиб ўтади. Насиб қилса, 15 мартга қадар ушбу ўқишим ҳам якунланади. Пандемия сабабли ўқиш муддати ҳам чўзилиб кетганди. Мана шундай сабаблар билан уйда озгина ушланиб қолдим. Бу борада клуб раҳбариятидан 3-4 кунга рухсат сўрагандим.

Бу орада Анвар Бердиев Даврон Файзиевнинг ўрнига бош мураббий бўлибди, деган миш-мишлар чиқиб кетди, бу бўлмаган гап. Мухлислардан бир нарсани илтимос қилардим, хар хил асосланмаган хабарларга ишонишмасин. Ёрдамчи мураббий лавозимига Анвар Бердиев вариантини ўзимиз, клуб раҳбарияти билан келишиб бир тўхтамга келгандик. Анварни номзодини ёрдамчи сифатида ўзим танлаб олганман. Қанақадир тушунмовчилик сабабми билмайман, айрим интернет нашрларида нотўғри маълумот кетиб қолиб, бу мухлислар орасида шубҳа ва гумонларни урчитган. Мен яна бир бор жамоамиз ишқибозларидан босиқлик билан ушбу вазиятни тўғри тушунишларини сўрардим, уларга ҳурматим чексиз.

Шу ўринда “Истиқлол” клубига ўз ташаккуримни билдираман, Бердиев ҳамда Лебедевни бизга ёрдамга келишларига тўсқинлик қилмаганлари учун. Биз барчамиз бу ерга “Бухоро” жамоасини Суперлигага қайтариш мақсадида енг шимариб ишга киришганмиз. Суҳроб Қобилов ва Мирислом Ҳасанов ҳам биз билан бирга ўз вазифаларини давом эттиришади. Улар клубнинг келажакдаги мураббийлари ҳисобланишади, ким келишидан қатъий назар улар жамоада қолишади. Биз катта бир аҳил оила бўлиб, мақсад сари интиляпмиз.

- Нега айнан Анвар Бердиев номзодига тўхталдингиз?

- Анвар Бердиевни танлашимдан мақсад, ҳужум чизиғимизда жуда кўп вазиятлар яратиляпти, лекин унумли фойдаланиш коэффициенти жуда паст. Биласиз, Анвар ўз вақтида мамлакатимиздаги тажрибали ҳужумчилардан бири эди. У менга ҳужумчиларни танлашда ёрдам беради, қолаверса, уларнинг малакасини ошириб боради.

- Сиз билан суҳбатни Бухоро шаҳрида олиб боряпмиз...

- Сизни тушундим, айни пайтда Бухородаман, мен ҳеч қаерга кетганим йўқ ва кетиш ниятим ҳам бўлмаган. Фақат айрим оммавий ахборот нашларининг шошқалоқлиги билан нотўғри хабарлар чиқиб кетган холос. Мен бу ерда ҳеч қандай муаммо кўрмаяпман. Насиб қилса, биз ҳаммамиз бир оила бўлиб, мақсадимиз сари ҳаракат қиламиз.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар