Даврон Файзиев: "Футболчилардан ҳеч қандай айб қидирмаслик керак"

“Қўқон-1912” “Динамо”ни қабул қилиб охирги дақиқаларда ўтказиб юборилган гол эвазига ғалабани қўлдан бой беришди. Учрашувдан кейин мезбонлар мураббийи Даврон Файзиев журналистларнинг саволларига жавоб қайтарди.

- Кечдан кўра ҳеч яхши дейишганидек, авваламбор оммавий ахборот воситалари ходимлари байрами билан сизларни табриклайман. Бугун иккала жамоага уч очко керак эди. Устунлик биз томонда бўлди деб айтсам, таблода 1:1 ҳисоби кўриниб турибди. Ўзимизни оқлашга ҳеч қандай сабаб йўқ. Биз мураббийлар штаби бироз хатоликка йўл қўйдик, деб ўйлайман. Ўйин охирида битта фойдаланилмаган ўзгаришни амалга оширишда кечикдик. Қолаверса, иккала жамоага жанговар ўйин учун раҳмат айтаман. Энг аламлиси, иккита учрашувдан бери охирги дақиқаларда гол ўтказиб юборяпмиз. Футбол шуниси билан қизиқ. Яна ўз устимизда ишлашимиз кераклиги дарс бўлди. Ўтган сафарги учрашувдан кейин ушбу баҳсда йигитларга хушёрликни йўқотмаслик ҳақида айтиб ўтгандик. Барибир дарвозани ишғол қилишда оқсадик. Бу биринчиси эмас. Биринчи даврани таҳлил қилсак, биттадан кўп гол ура олмаяпмиз. Ҳужум ва ҳимоя устида ишлашга эътибор қаратишимиз керак бўлади.

- Гол ўтказилган пайтда Ойбек Рустамов қўпол хатога йўл қўйди...

- Ўша вазиятда ҳеч нимани ўйламасдан тўпни тепиб юборса бўлди, эди. Бурчак зарбаси ёки аут бўларди. Буни биргина Ойбекни хатоси десак нотўғри бўлади. Рақибни ўша ҳужум ташкил қилишини бошидан таҳлил қилсак, Аваз Маматхўжаев ҳам тўпни тепиб, майдон ташқарисига чиқариб юбориши ҳам мумкин эди. Уларнинг ҳужуми давом этди, тўп майдондан чиқмади ва ўзгариш қилишимиз кечикди. Гол ўтказилганида бир футболчини айблаш нотўғри. Футбол жамоавий ўйин. Айб аввало биз мураббийлардан бошланади. Бу – футбол. Ҳатто, бундан ҳам ўта қўпол хатолар учраб турибди, ўзимизни чемпионатда ҳам. Шу аҳволга ўзимиз тушдикми, бундан ўзимиз чиқишимиз керак. Балки жамоага қандайдир ўзгариш керакдир. Буни клуб раҳбарлари ҳал қилишади. Бизга охиригача ишониб, қўллаб-қувватлаётган мухлисларимизга раҳмат.

- “Қўқон-1912” жамоаси ҳужумда оқсаяпти. Ёзги селекцияда ҳужумчи олиш режада борми?

- Аслида жуда катта режалар бор. Аммо имкониятимиздан келиб чиқиб иш тутамиз. Ойбек Рустамовни марказий ҳимояда ўйнатяпмиз. Масалан, ҳимоячи ва ҳужумчи олиш режамизда бор. Ҳаммасини кўриб чиқамиз. Ҳар бир жамоадан сўрасангиз ҳужумчи керак дейишади. Бундай иқтидорларни биз мураббийлар топишимиз керак. Ҳаммаси клуб бюджетидан келиб чиқиб амалга ошади ва уларга ишонч билдирамиз.

- Мўмин Мелиевни ўйини қовушмаяпти. Ўрнига Анвар Ҳожимирзаев майдонга туширилса бўлмасмиди?

- Сизни футболга қарашингиз мухлис сифатида. Биз мураббий сифатида қараймиз. Мелиев катта ҳажмдаги ишни бажаряпти. Фақат техник хато бўлиши мумкин, пас бериш ёки бошқа нарсада. Лекин рақиб жамоада босим ўтказишда ва ҳимоячилар билан курашишда анча фаоллик кўрсатяпти. Анварни ҳам майдонга тушириш режамизда бор эди. Фақат “Динамо”да баланд бўйли ҳимоячилар борлиги учун Мелиевга ишонч билдиргандик. Аламли икки очкони йўқотдик. Бугун биз ёки рақиб ютганида ҳақиқий хурсанд бўларди. Бир очкони турнир жадвалида бизга ҳам, уларга ҳам таъсири катта. Учинчи йил ишлаётган бўлсак, омадсизлик билиняпти. Чунки кетган футболчиларнинг ўрнини тўлдира олмадик. Жавоҳир Сидиқов ва Қувондиқ Рўзиев келиб, ўртани тўлдирдик. Аммо бошқа чизиқларда тўлдира олмадик, деб ўйлайман. Қачонки ютганда жамоа ютади, ютқазганда мураббий ютқазади. Футболчилардан ҳеч қандай айбни қидирмаслик керак. Яхши мураббий доим ўзидан қидиради, демак биз айбдормиз.