Даврон Файзиевнинг "Андижон"га ўтиши катта таваккалчилик, оғир вазиятдан чиқиб кетиш учун мўъжиза керак - Бахтиёр Ашурматовдан ёрдамчиси ва собиқ клуби ҳақида муносабат

Бош мураббийсиз қолган “Андижон” клубини иккинчи даврада ким бошқариши ҳозирча сўроқ остида турибди. Олдин хабар берганимиздек, клубнинг янги раҳбарияти бош мураббийликка асосан иккита номзодни – Александр Хомяков билан Даврон Файзиевни кўриб чиқишаётганди.

Куни кеча “Бухоро” устози Жамшид Саидов ўзининг маслаҳатчиси бўлган Хомяковнинг “Андижон”га қайтиши борасида ўз муносабатини билдириб, уни клубда қолишини истаётгани хусусида айтганди.

Хўш, Файзиев масаласи нима бўлди? Маълумки, у “Қўқон-1912”да бош мураббий Бахтиёр Ашурматовга яқиндан ёрдам беряпти. Ўз вақтида Ашурматов ҳам “Андижон”да ишлаб кетган. Шу сабабли Бахтиёр Аъзамович “Андижон”даги ўзгаришларга, ёрдамчиси Файзиевга бўлган қизиқишларига бефарқ эмасди. Шу сабабли Ашурматов sports.uz сайтига собиқ жамоасининг ҳозирги ҳолати ва Даврон Файзиевнинг тақдири тўғрисида гапирди.

-  “Андижон” жамоасида яхши томонга ўзгаришлар бўлиб турганидан хурсандман, - дея гап бошлади Бахтиёр Аъзамович. - Охирги йилларда клуб турли қийинчиликларга дуч келяпти ва доим Суперлигада қолиш учун курашаётган ёки про-лигадан чиқаётган бўлади. Умид қиламанки, жамоадаги ўзгаришлар яхшиликка ва ўз мухлисларини чиройли ўйинлари билан хурсанд қила олади. Янги раҳбариятнинг эса клубда ўзгаришларга қўл уриши турган гап. Мана, Виктор Кумиков ишдан кетди ва ўрнига янги мураббий излашяпти. “Андижон”нинг Даврон Файзиевга бўлган таклифи борасидаги муносабатим шундайки, у менинг яқин дўстим, йилнинг бошида “Қўқон-1912”га таклиф қилганимизда ҳам агар ўзида мустақил ишлаш имконияти бўлса, қўйиб юборишимиз мумкинлиги, хоҳиш-истагига қарашимиз ҳақида айтганмиз. Шу сабабли Файзиев мустақил ишлайман деса раҳбарият билан бирга унинг қарорини қўллаб-қувватлаймиз. Бироқ у билан бирга жамоамиздаги ишимиз самарали бўляпти. Шундай экан, Файзиев биз билан қолса табиийки хурсанд бўламиз. Аммо унинг ҳозирча “Андижон”га ўтиши амалга ошмади деб айтишимиз мумкин. Ҳозир айтганимдек, ўзимизнинг клубимиздаги ишларимиз чакки эмас. Яхши ўринда кетаётган жамоадан Суперлигада қолиш учун курашаётган клубга бориши бу - катта таваккал.

Биламан, Даврон Файзиев қийинчиликлардан қўрқмайди. Бунгача “Сўғдиёна”да ҳам, “Динамо”да ҳам ишлаб таркибда юлдуз футболчилар бўлмаса-да, жанговор жамоани шакллантирганди. Боз устига ўша клубларда молиявий аҳвол у қадар яхши эмасди. Албатта, Файзиевнинг борган жойида ишлаб кетишига ишонаман. Лекин ҳозирги пайтда “Андижон”да ишлаш боя айтганимдек, катта таваккалчилик. Раҳбарият билан учрашганимизда улар кўп йиллик режа тузишаётганини ва мураббийдан бирданига натижа талаб қилинмаслигини Давронга айтишган. Аммо у мендан натижа талаб қилишмаяпти, бемалол ишласам бўлаверади, деган фикрдан йироқ. Боргандан кейин барибир ишонч билдирган инсонларнинг ва мухлисларнинг умидларини оқлаши керак бўлади. Қолаверса, Андижонда ишқибозлар қанчалик талабчан эканлигини мен ҳам яхши биламан. Бу борада Файзиев билан ҳам маслаҳатлашдик. Бунинг устига “Андижон” таклиф борасида ҳам озгина кеч қолди. Ҳозир ҳеч қанақа селекция қила олмайди. Агар 10 кун олдин таклиф бўлганида ҳам у ерга бориб ҳаракат қилиб кўриши мумкин эди.

Агар кейинги мавсум бошида яна таклиф бўлса ва таркибга ўзи хоҳлаган ўйинчиларни қўша олса, бемалол яхши жамоа туза олади. Ҳозирча эса бу масалани ёпиб туришга қарор қилдик. Албатта, аниқ жавобни Давронни ўзидан ҳам эшитиш мумкин. Аммо бевосита ўзим ҳам бу таклиф ва шарт-шароитлар ҳақида билиб тургандим. Шу боис бемалол айтишим мумкинки, бу ўтиш амалга ошмади. Аслида Файзиев қийинчиликлардан асло қўрқмайди, у келажакда ишлаши ва яхши жамоа тузиши мумкин. Ҳозир эса селекция қилиб бўлмайди, вақт эса жуда кам қолган. Унга ишонч билдирган раҳбариятнинг ишончини қозониш эса ҳозирги вазиятда жуда қийинлигини ҳамма билиб турибди. Бундай оғир вазиятдан чиқиб кетиш учун мўъжиза керак, деб айтишим мумкин. Масалан, “Андижон”нинг етакчи ўйинчиси Жамшид Ҳасанов ҳам кетиб қолган. Бундай олиб қарасак, айни пайтда клубда етакчи ўйинчининг ўзи йўқ. Қолаверса, музокара жараёнида бир-иккита масала бўйича ҳам бир тўхтамга келинмади. Бироқ Даврон андижонликларнинг таклифига миннатдорчилик билдирди ва дўстона хайрлашилди. Ўз вақтида мен ҳам қийин вазиятга тушганман. У билан масаланинг ҳамма томонини ўйлаб кўрган ҳолда Файзиев билан бошлаган ишимизни бирга давом эттиришга қарор қилдик.

Қўқонда ишлаб туриб “Андижон”нинг имкониятлари тўғрисида фикр билдиришим нотўғри бўлади. Агарда иккала томон бир тўхтамга келганида биз ҳам имкон даражасида ёрдам беришга тайёр эдик. Файзиевнинг “Андижон”га ўтиши вақтлироқ амалга ошганида балки керакли позицияларга икки-учта ўйинчи бериб туриш эҳтимолимиз ҳам бор эди. Бу борада “Андижон”ни ва Даврон Файзиевни қўллаб-қувватлашга тайёр эдик. Унга бошқа жойлардан таклифлар бўлганида бу вариантларни кўриб чиқмадик. Аммо “Андижон”га бефарқ бўлмаганимиз ва у ерда таниш дўстларимиз ишлашаётгани сабабли улар билан кўришдик ва Файзиев музокара ўтказиб кўрди.

Холис фикримни айтадиган бўлсам, “Андижон”ни жуда оғир ўйинлар кутиб турибди. Суперлигада қолиш йўлида катта режалар билан ишга киришган янги раҳбариятга омад тилайман холос. Бироқ мени ҳозирда кўпроқ ўзимизнинг ўйинларимиз қизиқтиради. Негаки, жамоамизни ҳам олдинда мураккаб беллашувлар кутиб турибди. Бошқа клуб ҳақида фикр билдиргандан кўра ўз жамоам тўғрисида кўпроқ ўйлаганим ва шуғулланганим маъқул деб ўйлайман. “Андижон” жамоасида ҳам мураббийлар ўзгариб турибди, барибир бу ҳолат ҳам натижаларга таъсир қилади. Биринчи даврада яхши селекция қила олишмагани ва мураббийлар ўзгариши туфайли ҳам ғалаба қозона олмади. Ҳозирдан бу клубни Суперлигадан тушиб кетади ёки қолади, дейдиган фикрлар билдира олмайман. Албатта, ўз олдига қўйилган вазифани бажаришса хурсанд бўламан. “Андижон”нинг янги раҳбарияти Даврон билан учрашганида улар билан мен ҳам танишиб, гаплашдим. Раҳбариятнинг режалари катта ва бу йўлда Худонинг ўзи қўллаб-қувватлашини истаб қоламан. Шунақа қийин вазиятда Андижон футболи учун ёрдамга келишди. Бундай дамда юзлари ёруғ бўлишини тилайман, - деди Ашурматов.