Denis Cherishev Rossiyaga qaytishni xohlamadi

“Valensiya” yarim himoyachisi Denis Cherishev faoliyatini vatanida davom ettirishni xohlamadi.

SuperDeporte nashri tarqatgan xabarga qaraganda, 29 yoshli rossiyalik futbolchi nomi sir tutilayotgan Moskva jamoasidan bo‘lgan taklifni rad etgan. Ayrim ma’lumotlarga ko‘ra, bu “Spartak” yoki TsSKA bo‘lishi mumkin.

Denis esa “ko‘rshapalaklar”ning yangi bosh murabbiyi – Xavi Garsiyaning yangi mavsum rejalariga kiradi. Shu sababli ham u “issiq o‘rnini” o‘zgartirmoqchi emas.

Denis Cherishev “Valensiya” safida 2018 yildan buyon to‘p surib kelmoqda. U o‘tgan mavsum La Ligada 24 ta o‘yinda maydonga tushdi va 1 ta gol hamda 2 ta golli uzatmaga mualliflik qildi.