Денис Коростиченко: "Назаримда, "Андижон" Суперлигадаги стандарт вазиятлардан фойдаланиш борасида энг яхши жамоа"

“Андижон” – “Олимпик” (1:0) учрашувидан кейин ташкил этилган матбуот анжуманининг дастлабки қисмида меҳмонлар бош мураббийи Денис Коростиченко иштирок этди.

- Биринчи навбатда жамоамиз аъзоларининг жасорати, матонати учун уларга миннатдорлик билдирмоқчиман. Бугун йигитлар ҳаракат қилишди, курашишди. Улар жисмонан ҳам руҳан қаршилик кўрсата олдилар. Айтишим керакки, айрим футболчиларимиз мухлислар билан тўла бўлган стадионда биринчи бор ўйнашгани учун уларга осон бўлмади. Нима дея оламан: “ Андижон”ни ғалаба билан табриклайман. Майдон эгалари деярли бутун баҳс давомида ҳужум қилдилар ва охир-оқибат керакли натижага эриша олдилар. Биз эса режани ҳимояга таянган ҳолда тезкор қарши ҳужумлар ташкил этиш орқали тузгандик. Шунинг учун бўлса керак, баҳс  охирида чарчаб қолдик ва гол ўтказиб юбордик. Ҳа, бизда ҳам гол уриш учун имкон бўлди, бироқ вазиятдан фойдаланиш насиб қилмади.

- Бугунги учрашувда жамоангиз ҳимоячилари тартибли ўйнадилар. Биласиз, “Андижон” стандарт вазиятларда яхши ўйнай олади. Бу нарса устида машғулотларда алоҳида ишлаганмисизлар?

- Саволингиз учун раҳмат. Ҳа, биз “Андижон”нинг стандарт вазиятлардан унумли фойдалана олишини билардик. Шунга яраша ҳозирлик кўрдик, клубнинг Кубок финалидаги ўйинини ўргандик. Назаримда, бу Суперлигадаги стандарт вазиятлардан фойдалана олиш борасидаги энг яхши жамоа бўлса керак. Тайёргарлик давомида Бубанья ва Маматказин каби ижрочиларни тўхтатиб қолиш устида ҳам ишладик. Буни деярли уддасидан чиқа олдик, аммо охирида гол ўтказиб юбордик.

- Шу пайтгача “Олимпик” “Андижон”ни умуман енгга олмаган ва фақат бир марта дуранг қайд этган. Бу хусусида нима деган бўлардингиз?

- Эҳтимол, бу гапим бироз муболағали туюлар, аммо охиригача яхши ўйнаганимиздами, уйимизга очко олиб қайтган бўлардик. Лекин боя айтганимдек, “Андижон”нинг стадионида доим ўзгача муҳит ҳукмронлик қилади. Бунақа шароитда мезбонларга қарши туриш мутлақо осонмас. Мен бу ерга “Локомотив” билан ҳам келганман. Ўшанда ҳам бу ерда ўйнаш осон кечмаганди. Уй ўйини чоғида маҳаллий фанатлар, мухлислар суюкли жамоасига зўр далда бера оладилар. Албатта, “Олимпик” бу ерга келиб, ташаббусни ўз қўлига олган ҳолда ўйнайдиган жамоа эмас. Қолаверса, клубга бу борада тажриба ҳам етишмайди. Боз устига “Андижон” таркибидаги футболчилар бизникилардан кўра тажрибалироқ.  Ўйлайманки, бунақа шароитда “Андижон” янада зўр ўйнаши керак. Бундай жонкуяр мухлисларнинг кўмагига “Андижон” ажойиб ўйин орқали жавоб бериши шарт, деб ҳисоблайман. Жамоага омад тилайман!