"Динамо" машғулотларида эронлик футболчи иштирок этмоқда

Про лигага тайёргарлик кўраётган "Динамо" жамоаси Қаршида Суперлига баҳсларига тайёргарлик кўраётган "Насаф" клубига қарши иккита ўртоқлик ўйинида майдонга тушди.

Дастлабки учрашувда 0:0 ҳисоби қайд этилган бўлса, ёшартирилган ва бир қатор футболчилар синовдан ўтказилган иккинчи баҳсда "динамочилар" аламли тарзда мағлубиятга учради. Бу ҳақда Самарқанд клуби расмий сайти хабар тарқатди.

Учрашувда ҳисобни 49-дақиқада "Динамо" футболчиси Фахриддин Алимов очган бўлса, 60-дақиқада Аюбхонов четлатигач, "динамочилар" бир киши кам бўлиб қолишди. Шунга қарамай, 63-дақиқада самарқандлик 17 ёшли ярим ҳимоячи Акмал Козимов фарқни иккитага етказди – 0:2.

Ўйиннинг сўнгги дақиқаларида "динамочилар"нинг сон жиҳатдан кам экани ўз сўзини айтди – 80 ва 85-дақиқада қаршиликлар ҳисобни тенглаштирган бўлишса, 90-дақиқада белгиланган пенальтидан фойдаланиб, ўртоқлик ўйинида ғалабани илиб кетди – 3:2.

Қайд этиш жоиз, шу куни "Динамо" сафида эронлик 20 ёшли футболчи Ағо Муҳаммад Али кўрикдан ўтказилди. Эронлик ярим ҳимоячининг ҳаракатлари мураббийлар штабида илиқ таассурот қолдирса, Ағо Муҳаммад Али «Динамо» сафида қолиши мумкин.

Ўртоқлик учрашуви. Қарши

"Насаф" – "Динамо"  3:2

Голлар: 80, 85, 90 пенальти – Фахриддин Алимов 49, Акмал Козимов 63.

"Динамо": Умид Ҳамроев, Сарвар Абдусаломов, Асом Абдураҳмонов, Ойбек Жўраев, Сардор Саъдуллаев, Жавлон Маликов, Ағо Муҳаммад Али, Фахриддин Алимов, Ш.Аюбхонов, Акмал Козимов, Анвар Муродов.
Четлатиш: Ш. Аюбхонов (Динамо), 60.